Çox güman ki, Rusiya Çin müdafiə nazirinin Moskvaya səfəri ərəfəsində gözlənilmədın Sakit okean donanmasının təliminə başlamaqla özünü Çin üçün daha "cəlbedici” etmək və dəniz gücünü gpstərmək istəyir.
Bu barədə Qaynarinfo Müharibə Tədqiqi İnstitutunun (ISW) hesabatına istinadən xəbər
verir.
Son hesabatda ISW Rusiya Müdafiə Nazirliyinin Şərq hərbi dairəsinin Sakit okean donanmasının gözlənilməz və ən yüksək döyüş hazırlığına gətirilən qəfil təftişi barədə açıqlamasını təhlil edir. Bu barədə cümə günü, aprelin 14-də Rusiyanın müdafiə naziri Sergey Şoyqu məlumat verib.
ISW analitikləri hesab edirlər ki, Rusiya Sakit okean donanmasının döyüş hazırlığının yoxlanılması, çox güman ki, Çinə Rusiyanın Sakit okeanda Çinin təhlükəsizlik məqsədlərini dəstəklədiyi və Rusiyanın Ukraynada hərbi gücünün deqradasiyasına baxmayaraq, Sakit okean dövləti kimi çıxış edə biləcək bərabərhüquqlu hərbi tərəfdaş kimi qaldığına dair Çinə siqnal göndərmək məqsədi daşıyır.
Kreml Çinə belə bir siqnalı Çinin müdafiə naziri Li Şanfunun aprelin 16-18-də Moskvaya səfərindən əvvəl göndərir. Rusiya Müdafiə Nazirliyinin məlumatına görə, Şoyqu və Li müdafiə sahəsində ikitərəfli əməkdaşlıq, həmçinin regional və qlobal təhlükəsizlik məsələlərini müzakirə etmək üçün görüşəcəklər.
Ancaq aprelin 14-də Çinin xarici işlər naziri Tsin Qan, Pekinin Rusiyaya silah satmayacağını və Rusiyaya ikili təyinatlı malların ixracını tənzimləyəcəyini açıqlayıb.
ISW qeyd edir ki, bu cür bəyanatlar Çinin Rusiyaya verdiyi dəstəyi şifahi olaraq azaltmaq cəhdlərinin bir hissəsidir və Rusiya ilə Çinin iddia etdiyi "sərhədsiz” tərəfdaşlığın sərhədlərinin olduğunu nümayiş etdirir. Təhlilçilər bildirirlər ki, Putin Çin lideri Si Szinpinin martın 20-dən 22-dək Moskvaya səfəri zamanı Çinlə ümid etdiyi qeyri-məhdud ikitərəfli tərəfdaşlığı təmin edə bilməyib.
Kremlin, Yaponiyanın Xirosima şəhərində mayın 19-21-də keçiriləcək G7 toplantısından əvvəl Yaponiyanın Ukraynaya dəstəyini məhdudlaşdırmağa yönəlmiş Sakit okean donanmasının hazırlıq testindən də istifadə edəcəyi ehtimal edilir.
Beləcə, Şoyqu bildirib ki, hazırlıq yoxlanışı Oxot dənizinin cənub hissəsinə "düşmən qüvvələrinin” yerləşdirilməsinin qarşısını almaq və mübahisəli cənub Kuril adaları və Saxalinə enişi dəf etmək üçün üsulların işlənib hazırlanmasına yönəlib.
Rusiya bu yaxınlarda Yaponiyanın Rusiya tərəfindən işğalı altında olan Kuril adalarının şimal hissəsindəki Paramuşir adasında "Bastion” sahil müdafiə raket batareyasını yerləşdirib və ISW bunu Ukraynaya gələcək dəstək barədə Yaponiyaya xəbərdarlıq kimi qiymətləndirib.
Təhlilçilər Rusiyanın Yaponiyada hərbi eskalasiya ilə bağlı narahatlıqlarını artırmaq üçün Sakit okeanın şimalında hərbi manevrlərdən istifadə etmək niyyətində olduğunu və bununla da Tokionun Kiyevə növbəti dəstəyinin qarşısını almağa çalışdığını ehtimal edir. Rusiya Qərbə qarşı da oxşar məlumat əməliyyatları və şoulardan istifadə edərək eskalasiya ilə bağlı narahatlıqları artırır, baxmayaraq ki, bu hərəkətlər heç vaxt real eskalasiyaya səbəb olmayıb.
Lakin ISW əlavə edir, Rusiya ordusu indi Yaponiyanı təhdid etmək vəziyyətində deyil.
Xüsusən də, əvvəlcədən xəbər verildiyi kimi, 2023-cü ilin əvvəlində və 2022-ci ilin sonunda Sakit okean donanmasının 40-cı və 155-ci dəniz piyada briqadalarının bölmələri Donetsk vilayətinin Uqledar şəhəri yaxınlığında xeyli itki verib. Üstəlik, ötən il 155-ci briqada səkkiz dəfə komplektləşdirilib.
Nizami Bağırov
