Yeni məhkəmə-tibbi istintaq "Nirvana" qrupunun frontmeni Kurt Kobeynın 5 aprel 1994-cü ildə, 27 yaşında həyatına qəsd etdiyi qənaətini şübhə altına qoyub.

Qaynarinfo bu barədə "Daily Mail"ə istinadən xəbər verir.

Nəşr xatırladır ki, musiqiçi Sietldəki evində ov tüfəngindən aldığı güllə yarasından ölüb və bu yara özünə qəsd kimi qiymətləndirilib. O zaman Kinq okruqu dairəsinin tibbi eksperti ölümün səbəbinin intihar olduğuna qərar verib.

İndi isə qəzetin yazdığına görə, qeyri-rəsmi özəl məhkəmə ekspertləri qrupu meyitə yenidən baxış keçirib və hadisə yerindən əldə olunan məlumatları yenidən araşdırıb. İşə daha əvvəl odlu silah yaralanmaları ilə birlikdə narkotik həddinin aşılması halları üzrə təcrübəsi olan Brian Bernett cəlb olunub. Müstəqil tədqiqatçı Çişel Uilkins bildirib ki, Bernett sübutları üç gün araşdırdıqdan sonra belə deyib: "Bu, qətldir. Biz bununla bağlı nəsə etməliyik".

Onun sözlərinə görə, belə nəticə meyitə baxışın detallı təhlilindən sonra çıxarılıb, çünki orada ani ölümə uyğun gəlməyən əlamətlər aşkar edilib.

Məqalədə qeyd olunur ki, nəşrdə Kurt Kobeynın bir və ya bir neçə hücumçu ilə qarşılaşmış ola biləcəyini dəstəkləyən on arqument təqdim edilib. Hücumçular ona müqavimət göstərmək imkanı verməmək üçün böyük dozada heroin verə, sonra isə bir nəfər başına atəş aça, silahı əlinə qoyub və saxta vida məktubu buraxmış ola bilər.

Uilkins bildirib: "Meyitə baxış zamanı müəyyən məqamlar düşünməyə vadar edir: bu insan atəşdən dərhal ölməyib. Beyin və qaraciyər nekrozu narkotik həddinin aşılmasında yaranır. Tüfəngdən açılan atəşdə isə adətən belə şey müşahidə edilmir".

Kinq okruqu məhkəmə-tibbi ekspertiza bürosunun nümayəndəsi bildirib ki, yeni sübutlar ortaya çıxarsa, nəticələri yenidən nəzərdən keçirməyə hazırdırlar, lakin hazırda işin yenilənməsinə dair heç bir əlamət yoxdur. Sietl polis idarəsinin nümayəndəsi isə bildirib ki, iş yenidən araşdırılmayacaq.

Kurt Kobeyn haqqında vacib məlumatlar

Kurt Kobeyn - amerikalı musiqiçi, müğənni, bəstəkar və gitaraçı olub. Ən çox "Nirvana" qrupunun frontmeni kimi tanınıb. O, 20 fevral 1967-ci ildə anadan olub və 1990-cı illərin mədəniyyət ikonasına çevrilib, xüsusilə "Smells Like Teen Spirit” hit mahnısı ilə qrupunu dünya şöhrətinə çıxarıb.

Kurt Kobeyn X nəsli üçün simvol hesab edilir və öz səmimi, emosional musiqisi ilə ayrı-seçkilik, daxili mübarizə və sosial tənqid mövzularına toxunub. O, rok musiqisi və mədəniyyətinə böyük təsir göstərib.

Musiqiçi 5 aprel 1994-cü ildə, 27 yaşında vəfat edib; onun ölümü rəsmi olaraq intihar kimi qiymətləndirilib və musiqi tarixində ən çox müzakirə olunan, faciəvi hadisələrdən biri olub.

Aydın