Beynəlxalq ödəniş sistemi "Mastercard" dövriyyədə olan milyardlarla kartı zibilxanalardan xilas etmək planının bir hissəsi kimi qlobal kredit və debet kartlarının təkrar emalı layihəsinə başlayır.
Qaynarinfo xəbər verir ki, bu barədə "Reuters"
yazır.
İlk olaraq, layihə Britaniyanın "HSBC Holdings" bankı ilə birgə Böyük Britaniyadakı səkkiz filialda fəaliyyətə başlayır.
"Mastercard" bildirib ki, bəziləri yerli təşəbbüslər irəli sürmüş dünya üzrə banklar proqrama qoşula və miqyasda qənaətə nail olmağa kömək edə biləcəklər.
"Biz dünyanın bütün kart emitentlərini harada yerləşməsindən asılı olmayaraq bizimlə əməkdaşlıq etməyə və müştərilərinə kartların təkrar emalını təklif etməyə dəvət edirik", - "Mastercard"ın kibertəhlükəsizlik və kəşfiyyat üzrə prezidenti Acay Bhalla deyib.
Plana əsasən, "Mastercard" HSBC-ni hər biri 50 kq plastik ekvivalenti olan 10 000 kart saxlaya bilən doğrama maşınları ilə təmin edəcək. Maşınlar doldurulduqdan sonra onlar plastik təkrar emalı zavoduna köçürüləcək.
Planın maliyyə detalları açıqlanmayıb. İlk altı ay davam edəcək pilot layihə müştərilərə istənilən plastik kartları, o cümlədən rəqiblərin kartlarını təkrar emal etməyə imkan verəcək.
"Bu pilot layihə bizə çox vacib məlumat verəcək və uzunmüddətli planlarımızı inkişaf etdirməyə kömək edəcək", - Böyük Britaniyada HSBC-nin özəl bankçılıq şöbəsinin rəhbəri Xose Karvalyo bildirib.
Hazırda tədavüldə təxminən 3,1 milyard "Mastercard" kartı var. Onun hesablamalarına görə, sənayedə hər il təxminən 600 milyon kart buraxılır, hər birinin etibarlılıq müddəti təxminən beş ildir.
Sənayeni təhlil edən "Nilson Report"un hesabatında dövriyyədə olan kartların ümumi sayının 2022-ci il üçün təxminən 26 milyard olduğu qeyd edilir və 2027-ci ilə qədər 28,4 milyarda yüksələ biləcəyi proqnozlaşdırılır.
Nizami Bağırov
