Müharibə, daha doğrusu, yaxın qohumlarının ölümü və sonrakı təzminatlar ən kasıb rusiyalıların gəlirlərinin artmasında əsas amilə çevrilib.
Qaynarinfo "Bloomberg"ə istinadən xəbər verir ki, ölümə görə təzminat və hərbi əməliyyatların iştirakçılarına birdəfəlik ödənişlər Rusiyada yoxsulluğu
azaldıb.
Nümunə olaraq nəşr "ağ Lada” arzusunda olan Aleksey Malovun müharibədə həlak olan oğlu üçün təzminat alması ilə bağlı hekayəsini göstərir. Rusiya büdcəsinin döyüşçülər üçün xərcləri o qədər şişirdilib ki, bu, rekord büdcə kəsirinə gətirib çıxarıb. Agentlik qeyd edir ki, Vladimir Putin hərbi uğur naminə Rusiya iqtisadiyyatını qurban verməyə hazırdır.
"Dövlət kasıbları və imkansızları hədəf alır. Orta təbəqə üçün mesaj belə səslənir: "Əlvida, uşaqlar, siz təkbaşınasınız”, deyə agentliyə Rusiya regionları üzrə mütəxəssis və professor Natalya Zubareviç bildirib.
Nəşr hesablayıb ki, dövlət tərəfindən sosial xərclərin məcmu artımı əhalinin ən yoxsul təbəqələrinin 10%-nin gəlirlərinin kəskin artmasına imkan verib. "Bloomberg"in hesablamalarına görə, bu vəzifələrə dövlət xərclərinin artması yoxsul rusiyalıların gəlirlərinin 2022-ci ildə 11,9% təşkil edən inflyasiyanı iki dəfə üstələməsinə imkan verib. Hərbi sosial ödənişlər nəticədə rəsmi yoxsulluq həddinin altında yaşayan rusiyalıların əhəmiyyətli dərəcədə az olmasına səbəb olub. "Rosstat"ın 2022-ci ilin üçüncü rübünün məlumatına görə, ötən ilin eyni dövrü ilə müqayisədə yoxsulların sayı 700 min nəfər, 2022-ci ilin ikinci rübü ilə müqayisədə isə 2,3 milyon nəfər azalıb.
2023-cü ildə dövlətdən sosial ödənişlərin azaldılmasını gözləməyə dəyməz. Maliyyə naziri Anton Siluanov daha əvvəl bildirib ki, o, ölkədə yoxsulların sayını azaltmaq üçün tədbirlərin kəsilməsindənsə, infrastruktur xərclərini azaltmağa üstünlük verir. Lakin belə ritorika və onun həyata keçirilməsi Rusiya büdcəsi üçün ciddi risklər yaradır, xüsusən də neft sanksiyaları uğurla nəticələnərsə.
"Sosial və hərbi xərclərin artması, neft və qaz gəlirlərindəki çatışmazlıq, bu il Rusiyanın fiskal balansını qeyri-adi dərəcədə kövrək edəcək. Gəlir çatışmazlığı riski ilə üzləşən hökumət inflyasiyanın sosial müavinətlərin real dəyərini qismən azalmasına imkan verən fiskal konsolidasiyaya üstünlük verə bilər”, deyə "Bloomberg Economics"in Rusiya iqtisadçısı qeyd edir.
Nizami Bağırov
