Fevralın 24-də başlayan Rusiya-Ukrayna müharibəsi milyonlarla ukraynalının həyatını alt-üst edib.
Qaynarinfo xəbər verir ki, Türkiyənin "Hürriyət" qəzetinin əməkdaşı işğaldan əvvəl
görüşdüyü ukraynalı gənclərlə yenidən əlaqə saxlayıb və müharibənin onların həyatlarını
necə dəyişdiyini soruşub.
"İnanmaqda çətinlik çəkdim"
"Hürriyət"in
əməkdaşı işğaldan bir neçə gün əvvəl Kiyev küçələrində söhbətləşdiyi qəhvə restoranlarından
birinin əməkdaşı, 20 yaşlı Elviradan şəhərdəki
son vəziyyət barədə soruşub. Yaşadıqlarını "Hürriyyət”ə danışan Elvira bunları
deyib: "İlk günlərdə baş verənlərə inanmaqda çətinlik çəkirdim. Birinci gün nənəm
məni oyadıb dedi ki, müharibə başlayıb. İnanılmaz dərəcədə qorxdum”.
Davamlı
olaraq ağladığını və sevgilisinin dəstəyi sayəsində sağ qala bildiyini deyən
Elvira xoşbəxtlikdən tanıdığı heç kimin də xəsarət almadığını bildirib.
"Səslər çox qorxulu idi"
Hələ
ötən yanvarın sonunda Elvira Rusiyanın
Kiyevə gələcəyi ilə bağlı çoxlu xəbərlər eşidib, amma bunun doğru
olacağına inanmadığını deyirmiş. Dünənki telefon danışığında isə o, "Bomba səsləri
çox yüksək idi. Ən qorxulusu səslər idi, hər gün bu səslər təkrarlanırdı" deyib.
Elvira bildirib ki, indi Kiyev normal vəziyyətə qayıtmağa çalışır: "Elə mən də..."
O, yenidən barista kimi işləməyə başlayıb.
Rusiya ilə problemlərin müharibədən əvvəl həllini
arzuladığını deyən Elviranın münasibəti az qala bütün ukraynalılar kimi sərtləşib: "Ümid edirəm ki, onlar elədiklərinin əvəzini ödəyəcəklər".
"Kiyevə geri dönməyi düşünmürəm”
Jurnalistin
işğaldan əvvəl Kiyev meydanında söhbət etdiyi reklamçı, 18 yaşlı tələbə Sofiya hazırda ölkənin
ən qərb şəhəri olan Lvovdadır və tezliklə Kiyevə qayıtmağı planlaşdırmır.
Sofiya
həmin günü belə xatırlayır: "Müharibə başlayanda mən televizorda xəbərlərə
baxırdım. Saat 04:00-da bombardman başladı. Dərhal zinət əşyalarımı, bir neçə
yemək və digər zəruri əşyalarımı toplamağa başladım. Universitet yataqxanasında
qalırdım. Məmurlar dedilər ki, şəhərdən çıxıb qərbə gedək. Bacım və əri ilə Lvova
gəldim. Biz yol boyu bombaların partlayış səsini eşidirdik".
10 milyon insandan biri
Sofiya
işğal nəticəsində didərgin düşmüş 10 milyon ukraynalıdan biridir və işğaldan əvvəl
müharibənin başlayacağına əmin olmadığını, bəzi tanışlarının "müharibə mümkün
deyil” dediyini də qeyd edir. Nisbətən müharibədən kənarda olmasına baxmayaraq, Lvova qarşı da raket hücumlarının artdığını təsdiqləyən Sofiya, "Bu yaxınlarda
qatar relslərinə hücum oldu... Lvov şəhəri də indi çox sakit deyil" deyib.
"Pasxa
bayramında belə bombaladılar"
Ölkənin
şərqindəki ən böyük yaşayış məntəqələrindən biri olan Kramatorskda Ukrayna
bayrağının dalğalandığı son nöqtə olan Avdiivkayda yaşayan və mehmanxana sahibi olan Aleksey Pasxa
bayramında belə bombardmanların dayanmadığını deyib. Jurnalist qeyd edib ki, aprelin 8-də Aleksey
ilə sonuncu dəfə görüşdüyü Kramatorsk vağzalına raket hücumu nəticəsində 59 nəfər
həlak olub. O, hələ də işinə davam etdiyini deyib. Aleksey bildirib ki, onlar hətta
Pasxa bayramına baxmayaraq, şəhəri bombalamağa davam etdilər: "Hər yerdən
tarakan kimi çıxırlar... Onlar üçün müqəddəs heç nə yoxdur".
Ukraynada
paytaxt və qərbdəki şəhərlər normal həyata dönməyə çalışır. Kiyevdə hava hücumu
siqnalları hər gün səslənsə də, bu ölkədə olan diplomatlar şəhərə qayıdır, restoranlar
az-az olsa da, fəaliyyətini bərpa etməyə çalışır.
Qeyd
edək ki, ötən gün Kiyevə səfər edən və səfirliyin
yenidən açılacağını açıqlayan ABŞ dövlət katibi Antoni Blinken küçədə gəzən
insanlara diqqət çəkərək Rusiyanın uğursuzluğa düçar olduğunu deyib.
Günay İlqarqızı
