NATO-da Ukraynanın dəvət olunması ilə bağlı konsensus yoxdur - Ağ Ev

Qaynarinfo xəbər verir ki, bu barədə oktyabrın 17-də ABŞ prezidenti Co Bayden administrasiyasının yüksək rütbəli rəsmisi jurnalistlərə bildirib.

"Ancaq bildiyiniz kimi, cəmi bir neçə ay əvvəl - iyulda, iyulun ortalarında NATO sammitində 32 müttəfiqin hamısı təsdiqlədi ki, Ukrayna üzvlüyə doğru dönməz yoldadır. Beləliklə, sual bu yolu necə təşviq etmək və növbəti addımlarda konsensusa necə nail olmaq taktikasıdır", - rəsmi qeyd edib. 

Ağ Ev rəsmisinin sözlərinə görə, həm prezident Bayden, həm də digər ABŞ rəsmiləri ümumiyyətlə Ukraynanın "güclü mövqe”yə keçməsini istəyirlər.

"Biz istəyirik ki, Ukrayna bu müharibədə qalib gəlsin. Və biz ona bunu etmək üçün lazım olan imkanları verməliyik. Ancaq bunu təkbaşına edə bilmərik. Biz bunu tərəfdaşlarımız və müttəfiqlərimizlə etməliyik, buna görə də prezident Bayden Ramşteyn sammitini və ya rəsmi olaraq Ukrayna Müdafiə Əlaqə Qrupu adlanan liderlər səviyyəsində görüş çağırıb. Biz isə onu təxirə saldıq və böyük ehtimalla gələn ay, noyabrda sammit baş tutacaq. Sizə elan edəcəyim tarix yoxdur, lakin biz bu görüşü gələn ay keçirməyi gözləyirik”, - deyə o yekunlaşdırıb.