Qaynarinfo xəbər verir ki, Fəlakət nəticəsində 469 nəfər həyatını itirib, 1300-dən çox şəxsdən isə xəbər yoxdur. Xilasetmə işləri davam edərkən ABŞ Prezidenti Donald Tramp Nepalın ehtiyac duyduğu bütün yardımın göstəriləcəyini açıqlayıb.

Nepalda daşqın və torpaq sürüşmələrinin səbəb olduğu fəlakətin nəticələri ağırlaşır. Nepal polisi cümə günü səhər verdiyi açıqlamada daşqın nəticəsində ölənlərin sayının 469-a yüksəldiyini bildirib. Çinin Tibet bölgəsində də 3 nəfərin həyatını itirdiyi açıqlanıb.

1300-dən çox şəxsdən xəbər yoxdur

Nepal və Tibetdə 1300-dən çox şəxsin itkin düşdüyü bildirilir. Xilasetmə qrupları sağ qalanlara çatmaq və itkin şəxsləri tapmaq üçün işlərini davam etdirir.

Lakin dağlıq ərazi, əlverişsiz hava şəraiti, zədələnmiş yollar və körpülər, eləcə də rabitə və elektrik enerjisinin kəsilməsi xilasetmə işlərini çətinləşdirir.

Nepalın Baş naziri Balendra Şah cümə axşamı 69 təxliyə uçuşu ilə 573 nəfərin xilas edildiyini açıqlayıb. Şah həmçinin Nepal ordusu, silahlı polis qüvvələri və milli polisdən 13 mindən çox təhlükəsizlik əməkdaşının bölgəyə cəlb edildiyini bildirib.

Baş nazir Şah hökumətin prioritetinin insanların həyatını xilas etmək, itkin düşənləri axtarmaq və zərərçəkənlərə yardım çatdırmaq olduğunu deyib. Şah daşqından zərər çəkən ərazilərə də baş çəkir.

Ucqar bölgələrə çatmaq günlər çəkə bilər

Fəlakətlərin idarə olunması üzrə ekspertlər bəzi yaşayış məntəqələrinə çatmağın günlər, hətta həftələr çəkə biləcəyi barədə xəbərdarlıq ediblər.

Tulane Universitetinin Fəlakətlərə Davamlılıq üzrə Liderlik Akademiyasının direktoru doktor Regardt Ferreira Daily Mail-ə açıqlamasında bildirib ki, ucqar və dağlıq ərazilərdə zədələnmiş yollar, körpülər və rabitə infrastrukturu bütün yaşayış məntəqələrini qısa müddətdə təcrid edə bilər.

Ferreira bildirib ki, daşqın və torpaq sürüşmələrindən sonra geridə qalan dağıntıların miqyası və həcmi ərazilərə çıxışı daha da çətinləşdirə, yolları bağlaya və bəzi marşrutları tamamilə keçilməz vəziyyətə sala bilər.

Onun sözlərinə görə, çıxış imkanları fövqəladə hallara müdaxilə qrupları üçün ən böyük problemlərdən biri olacaq. Yardıma ehtiyac duyulan yerlər müəyyən edilə bilər, lakin bu yaşayış məntəqələrinə fiziki olaraq çatmaq üçün çox məhdud imkanlar mövcuddur.

Ferreira bəzi ərazilərdə hava yolu ilə yardımın yeganə seçim ola biləcəyini bildirib. Onun sözlərinə görə, təcrid olunmuş yaşayış məntəqələrinə çatmaq hava şəraitindən, mövcud təyyarələrin sayından və yardım tələbinin miqyasından asılı olaraq günlər, bəzi hallarda isə həftələr çəkə bilər.

Ferreira həmçinin yerli xilasetmə qruplarının özlərinin də ailə üzvlərinin itirilməsi kimi fəlakətin ağır nəticələri ilə üzləşdiyini, buna baxmayaraq onların başqalarına yardım etməsinin gözlənildiyini qeyd edib.

Hidroelektrik stansiyasında 350 nəfər xilas edilib

Nepal ordusu Yuxarı Trishuli hidroelektrik stansiyasının tunelində ilişib qalan 350 nəfəri xilas edib. Lakin içəridə daha 100-ə yaxın şəxsin qaldığı ehtimal edilir.

İşçilər və yerli sakinlərdən ibarət qrup çərşənbə günü baş verən daşqından bəri hidroelektrik stansiyasının daxilində qalıb. Xilasetmə qrupları təhlükəli şəraitə baxmayaraq içəridə qalan şəxslərə çatmaq üçün işlərini davam etdirir.

Səhiyyə mərkəzləri dolmağa başlayıb

Daşqından zərər çəkən ərazilərdəki səhiyyə mərkəzlərinə müraciət edən xəstələr arasında palçıq səbəbindən boğulma və zərbələr nəticəsində yaranan xəsarətlər müşahidə olunub.

Tribhuvan Universitetinin Tədris Xəstəxanasının direktor müavini doktor Qopal Sedain Sky News-a açıqlamasında döş qəfəsi, qarın, ətraflar və üz nahiyəsində travmatik xəsarətlərin müşahidə edildiyini bildirib.

Sedain bildirib ki, çox sayda insan su ilə qarışmış palçıq səbəbindən boğulub və onların bədənlərində, burunlarında, üzlərində və ağızlarında palçıq olub.

Doktor Sedain xəstəxanaya gözləniləndən daha az sayda xəstənin gətirildiyini bildirib. O, bunun çox sayda insanın daşqın sularına qərq olması və səhiyyə mərkəzlərinə çatmaqda çətinlik çəkməsi ilə bağlı ola biləcəyini deyib.

Narahatlıq doğuran zəlzələ

Almaniya Geoloji Tədqiqat Mərkəzinin (GFZ) məlumatına görə, cümə axşamı gec saatlarda Tibetdə 5,0 bal gücündə zəlzələ baş verib. Zəlzələnin episentrinin daşqının baş verdiyi ərazidən yüzlərlə kilometr şimalda yerləşdiyi bildirilib.

Bölgədə həmçinin torpaq sürüşməsi nəticəsində yaranan təbii bənd səbəbindən böyük miqdarda su toplanıb. Ekspertlər həmin bənddə baş verə biləcək hər hansı hərəkətin suyun səddini aşmasına və ikinci daşqına səbəb ola biləcəyi barədə xəbərdarlıq ediblər.

Trampdan Nepal üçün yardım vədi

ABŞ Prezidenti Donald Tramp Nepaldakı fəlakətdən sonra ölkəyə yardım göndəriləcəyini açıqlayıb.

Tramp Ağ Evdəki Oval kabinetdə jurnalistlərə açıqlamasında deyib: “Bu, dəhşətli vəziyyətdir. Nepal ilə əlaqə saxladıq, onların ehtiyac duyduğu hər cür yardımı təklif etdik.”

Tramp əlavə edib: “Yardım göndəririk və liderlərlə danışdıq. Onlara istədikləri hər şeyi təmin edəcəyimizi bildirdik.”

Aydın