Tədris ilinin ilk günündə övladının məktəbində keçirilən tədbirdə hər bir ana dəbli görünmək istəyir. Azərbaycanda olduğu kimi, sentyabrın əvvəlində hava adətən isti olduğundan çoxsaylı geyimlərə ehtiyac yoxdur. T-shirt və ya yüngül koftanı dəbli şalvar və ya ətəklə kombin etmək olar.

Qaynarinfo xəbər verir ki, əgər 1 sentyabrda məktəb tədbirinə nə geyinəcəyinizlə bağlı fikir yoxdursa, klassik və həmişə uğurlu görünən seçimə üstünlük vermək olar. Qara köynək, qara şalvar, qəhvəyi kəmər və klassik dabanlı ayaqqabıdan ibarət obraz həm lakonikdir, həm də tədbirin ab-havasına uyğundur. Tünd rəng fiquru vizual olaraq daha incə göstərir və müxtəlif xarici görünüş tiplərinə uyğun gəlir.

Açıq rənglərə üstünlük verənlər üçün

Qara rəngi sevməyən və ya bu rəngdə geyimin isti ola biləcəyindən narahat olanlar digər tonlara üstünlük verə bilərlər. Bej, ağ və pastel-çəhrayı köynəyi eyni qara şalvarla kombin etmək, yaxud açıq rəngli şalvar seçmək mümkündür.

İstənilən rəngdə zolaqlı köynək də dəbli görünə bilər. Əsas şərt onun təmkinli və lakonik olmasıdır. Aksessuarlar da diqqətçəkən deyil, zövqlü olmalıdır. Qızılı və ya gümüşü sırğa, kulon, bilərzik və ya saat obrazı tamamlaya bilər.

Qara şalvarı bej və ya ağ rəngli modellə əvəz etmək, qəhvəyi kəmər taxmaq, üzərindən trikotaj mayka geyinmək və çiyinlərə pencək atmaq olar. Bu, olduqca bahalı və zövqlü görünən "old money" üslubunda obraz yaradacaq.

1 sentyabr üçün don və ətək seçimləri

Şən obraz üçün digər uğurlu seçim don ola bilər. Fiqurun üstünlüklərini vurğulayan və çatışmazlıqları gizlədən model seçməklə zövqlü görünüş yaratmaq mümkündür.

Fiquru buna imkan verən xanımlar dizdən yuxarı açıq-qəhvəyi ətəyi pastel tonlarda, sərbəst kəsimli kofta ilə kombin edə bilərlər. Qara corab və hündürdaban çəkmələr obrazı tamamlayacaq. Sadə saç düzümü və minimal aksessuarlarla 1 sentyabr üçün zərif görünüş əldə etmək olar.

Daha romantik üslub istəyənlərə midi və ya maksi ətəklər, xüsusilə pliseli modellər tövsiyə olunur. Məsələn, ağ və ya bej ətəyi pastel tonlu üst geyimlə, üzərindən isə bədəni sıxmayan, sərbəst kəsimli pencəklə kombin etmək olar. Ayaqqabı kimi mule, sabo və ya burnu açıq sandal seçilə bilər.

Daha sadə variant isə sərbəst kəsimli qara donu kontrast rəngli pencəklə birləşdirməkdir. Belə obraz müxtəlif bədən quruluşlarına uyğun gəlir.

Dar ətəkləri sevənlər üçün

"Corab" fasonlu dar ətəklərə üstünlük verən xanımlara stilistlər daha sərbəst üst geyim seçməyi məsləhət görürlər. Bu halda qara, boz və ya qəhvəyi rəngli dar trikotaj midi və ya maksi ətək ağ, bej və ya açıq-mavi rəngli sərbəst köynəklə kombin edilə bilər.

Obrazı ağ krossovka və ya kedlər, loaferlər, oksford ayaqqabıları və uyğun rəngdə çanta ilə tamamlamaq mümkündür.

Bu kombin həm yüngül və rahat, həm də zövqlü görünüş yaradır. Üstəlik, xüsusi səy tələb etmir, çünki bu cür baza geyimləri demək olar ki, hər qadının qarderobunda var.

Aydın