"Vidadi Zeynalov bütün əmrləri Əli Abbasovdan alıb…"

Vəkil bildirib ki, müdafiə etdiyi şəxsin həbsdə vəziyyətinin yaxşı olmadığını qeyd edib: “Son 1 ay yarım ərzində 5 dəfə kamerası dəyişdirilib. Hər dəfə də daha pis şəraiti olan kameralara salınıb. O, 4 gün “kars”a salınıb. Ailə üzvləri ilə görüşməsinə, telefonla danışmasına, yemək verilməsinə, xəstəxanaya müraciət etməsinə icazə verilmir. Məqsəd Vidadi Zeynalovu alçaltmaqla psixoloji təzyiq göstərməkdir. Bunun səbəbini də bilmirik. Biz başa düşə bilmirik, Vidadi Zeynalov rabitə nazirinin əmrinə tabe olubsa, 10 ay İstintaq Təcridxanasında məhbus kimi cəza çəkən şəxsə qarşı sadaladığım hərəkətlərin aparılması nə dərəcədə düzgündür? İstənilən ağır cinayət törədənlər istintaq təcridxanasının qaydalarına uyğun əksər hüquqları ilə təmin edilir, heç bir məhdudiyyət qoyulmur. Vidadi Zeynalova qarşı belə məhdudiyyətlər qoyulmasının səbəbini isə biz anlamırıq. Dəfələrlə, İstintaq Təcridxanasının rəhbərliyinə və Korrupsiyaya Qarşı Mübarizə Baş İdarəsinə müraciət etmişik, lakin heç bir nəticə olmayıb. Vidadi Zeynalov ürək-damar xəstəlikləri, bel və diz qapağının ağrılarından əziyyət çəkir. Bu ağır rejimdə saxlanılması nəticəsində sabah baş verə biləcək fəsadların qarşısında kim cavab verəcək?

Hazırda istintaq yekunlaşıb, tanış olma mərhələsidir. Vidadi Zeynalov heç bir ittihamı qəbul etmir. O, nə nazir, nə də nazir müavini olmayıb. Vidadi Zeynalov bütün əmrləri nazirdən alıb və icra edib. Sadəcə, bunun nəticəsində 10 aydır cəza çəkir”.

Qeyd edək ki, Vidadi Zeynalov 2015-ci ilin noyabrında saxlanılıb. O, Cinayət Məcəlləsinin 179.3.2-ci (mənimsəmə və ya israf etmə, külli miqdarda törədildikdə) və 308.2-ci (vəzifə səlahiyyətlərindən sui-istifadə) bu Məcəllənin 308.1-ci maddəsi ilə nəzərdə tutulmuş əməllər ağır nəticələrə səbəb olduqda və ya seçkinin (referendumun) nəticələrinə təsir məqsədilə törədildikdə) və 313-cü (vəzifə saxtakarlığı) maddələri ilə ittiham edilir.