ABŞ-ın yeni hərbi yardım paketi, o cümlədən kasetli sursatlar Ukrayna Silahlı Qüvvələrinə Ukrayna ərazilərini işğaldan azad etməyə və bir çox Ukrayna əsgərinin həyatını xilas etməyə əhəmiyyətli dərəcədə kömək edəcək.
Qaynarinfo "Unian"a istinadən xəbər verir ki, bu barədə Ukraynanın müdafiə naziri Aleksiy Reznikov
bildirib.
O qeyd edib ki, Kiyev uzun müddətdir, Qərbdən kasetli sursatlar istəyir. Onların istifadəsi Ukraynanın ratifikasiya etdiyi beynəlxalq sənədlərin heç birini pozmur. Üstəlik, Rusiya işğalın ilk günündən bu cür sursatlardan fəal şəkildə istifadə edir.
"Biz müvəqqəti olaraq işğal olunmuş ərazilərimizi azad edib, xalqımızın həyatını xilas etməliyik. Bunun üçün ərazilərimizi işğal edən düşmənə - hərbi cinayətkarlara, təcavüzkarlara, talançılara zərər vurmaq lazımdır. Onlar nə qədər çox itki versə, bir o qədər çox ukraynalının həyatını xilas edə bilərik”, - nazir bildirib.
Reznikov həmçinin kaset sursatlarından istifadə edərkən Ukraynanın əməl edəcəyi 5 prinsipi qeyd edib:
Onlar Rusiyanın beynəlxalq səviyyədə tanınmış ərazisinə zərbələr endirmək üçün deyil, yalnız Ukraynanın beynəlxalq səviyyədə tanınmış ərazilərinin işğaldan azad edilməsi üçün istifadə olunacaq.
Ukrayna Silahlı Qüvvələri mülki əhali üçün risklərin qarşısını almaq məqsədilə şəhər ərazilərində kasetli sursatlardan istifadə etməyəcək. Onlar yalnız Rusiya hərbçilərinin cəmləşdiyi ərazilərdə düşmənin müdafiə xəttini yarmaq üçün istifadə olunacaq.
Bu silahların istifadə olunma faktları və yerlərinin ciddi uçotu aparılacaq.
İşğaldan təmizləndikdən sonra partlamamış hərbi sursatlardan yaranan təhlükəni aradan qaldırmaq üçün bu ərazilər minalardan təmizlənməsi üçün prioritet olacaq.
Ukrayna partnyorlarını kaset sursatlarının istifadəsi, o cümlədən onların effektivliyi barədə məlumatlandıracaq.
Qeyd edək ki, bir gün əvvəl ABŞ Ukraynaya böyük bir hərbi yardım paketi ayırıb, o cümlədən artilleriya üçün kasetli sursatlar da bu paketə daxildir. Prezident Bayden bu qərarı çətin, lakin adi yüksək partlayıcı mərmilərin çatışmazlığı baxımından zəruri adlandırıb.
Bundan əvvəl bir sıra Qərb hüquq müdafiəçiləri və rəsmiləri Ukraynaya kaset sursatlarının tədarükünə qarşı çıxış ediblər. Onlardan bəziləri böyük təsir sahəsinə malik bu cür silahlardan istifadənin mülki əhali arasında itkilərə səbəb olacağından ehtiyat edirdilər.
Bununla belə, daha ciddi risk odur ki, əsas kasetli sursatın içərisində olan subsursatlar istifadə zamanı sıradan çıxa və yerdə qalaraq piyada əleyhinə minaya çevrilə bilər. Belə partlamamış yüklər müharibədən sonra uzun illər təhlükəli ola bilər.
Məhz buna görə də 2008-ci ildə Kasetli Silahlar haqqında Konvensiya yaradılıb ki, bu da onların bu cür silahların yığılmasını, ötürülməsini və istifadəsini qadağan edir. Lakin bu günə qədər yalnız 84 ölkə konvensiyanı ratifikasiya edib, əsasən də Avropa və Afrikada. Nə ABŞ, nə Ukrayna, nə də Rusiya konvensiyanın iştirakçısı deyil və ona əməl etmək tələb olunmur.
Alpər
