Rusiya hakimiyyəti Yaxın Şərqdən olan qaçqınlara Avropa İttifaqı ölkələrinə getmək üçün viza verir.
Qaynarinfo bu barədə "Bild"ə istinadən xəbər verir.
Nəşrin ixtiyarında Almaniya polisinin Avropa İttifaqında qeyri-qanuni miqrantların sayının artması ilə bağlı hesabatı var. Mart ayında 22.500 qeyri-qanuni mühacir Aİ sərhədlərində saxlanılıb. Bu, ötən ilin eyni dövrü ilə müqayisədə 60% çoxdur. Onların çoxu Türkiyədən gəlir, amma Yunanıstan yox, Rusiya vasitəsilə.
İndi Türkiyədə Yaxın Şərqdən gələn 4 milyona yaxın qaçqın var. Bu yaxınlarda onların çoxu Rusiya vizası üçün müraciət edir, onunla Rusiyadan keçməklə Belarusa gedir, orada Aİ sərhədini qanunsuz keçərək Polşa və Çexiya vasitəsilə Almaniyaya gəlir.
"Rusiya Federasiyası vasitəsilə Belarusa və daha sonra Aİ-yə getmək üçün Rusiya vizalarından sui-istifadə halları davam edir", deyə polisin hesabatında deyilir.
Alman hüquq-mühafizə orqanları bu marşrutun sosial şəbəkələrdə aktiv şəkildə reklam edildiyini qeyd edirlər. Ekspertlər bildirirlər ki, Türkiyədən Rusiya və Belarusa xüsusi təyyarələr uçur, miqrantlar gətirilir.
Nizami Bağırov
