Çərşənbə axşamı, noyabrın 7-də gecə yarısı Rusiya Federasiyasının Avropada Adi Silahlı Qüvvələr haqqında Müqavilədən (CFE) çıxması proseduru nəhayət tamamlanıb.
Qaynarinfo xəbər verir ki, bu barədə Rusiya Xarici İşlər Nazirliyinin Telegram kanalında dərc olunmuş
bəyanatda deyilir.
"2023-cü il noyabrın 7-si saat 00:00-da Rusiyanın bu Müqavilədən çıxması ilə bağlı CFE Müqaviləsində nəzərdə tutulmuş prosedur başa çatıb”, - nazirlik bildirib.
XİN-dən qeyd edilib ki, beləliklə, Rusiya Federasiyası tərəfindən hələ 2007-ci ildə qüvvəsi dayandırılmış bu beynəlxalq hüquqi sənəd nəhayət, onun üçün tarixə çevrilib.
"Rusiya nəhayət, təəssüflənmədən və onun haqlı olduğuna tam əminliklə CFE Müqaviləsi ilə vidalaşır. Onun yaradılması və həyata keçirilməsi zamanı əldə edilmiş təcrübə - həm müsbət, həm də mənfi - nəzərə alınacaq”, - XİN əlavə edib.
2023-cü il mayın 10-da Rusiya prezidenti Vladimir Putin CFE Müqaviləsinin denonsasiyası haqqında qanunun hazırlanmasına göstəriş verib. Mayın 29-da Putin Avropada Adi Silahlı Qüvvələr haqqında Müqaviləni denonsasiya edən qanunu imzalayıb. Daha sonra Rusiya Xarici İşlər Nazirliyi 2023-cü il noyabrın 7-də Rusiyanın nəhayət CFE Müqaviləsindən çıxacağını açıqlayıb.
CFE Sazişi 1990-cı ildə Parisdə imzalanıb. 2007-ci ildə Moskva sazişin şərtlərinin yerinə yetirilməsinə moratorium elan edib, çünki NATO ölkələri onu ratifikasiya etməmişdilər. 2015-ci ildə Rusiya CFE Müqaviləsində iştirakını dayandırmaq prosesini başa çatdırıb, lakin formal olaraq bu müqavilədə qalmağa davam edib.
Bundan əvvəl NATO Rusiyanı CFE Müqaviləsi ilə bağlı qərarı yenidən nəzərdən keçirməyə çağırıb.
Alpər
