Rusiya Federal Təhlükəsizlik Xidmətinin Novosibirsk vilayəti üzrə sərhəd idarəsinin əməkdaşları 1988-ci il təvəllüdlü Azərbaycan vətəndaşı Vüsal Azadovu saxlayıb.
APA-nın Rusiya mətbuatına istinadən xəbərinə görə, V.Azadov Azərbaycana deportasiya olunarkən qaçmağa cəhd edib.
Krasnoyarsk diyarında müvəqqəti yaşayan V.Azadov bir sıra inzibati xətalara yol verib. Bu ilin iyun ayında Krasnoyarsk məhkəməsi onu Rusiyadan deportasiya etməklə inzibati məsuliyyətə cəlb edib. Avqustda o, Bakıya göndərilmək üçün hava limanına gətirilib, lakin tanışlarının köməyi ilə qaçaraq gizlənib.
Dərhal axtarışlarına başlanan V.Azadov elə öz soydaşlarının verdiyi informasiya əsasında yenidən saxlanılıb və Azərbaycana deportasiya edilib.
