Sarımsaq və zəncəfil hər ikisi sağlamlıq üçün faydalı məhsullar hesab olunur. Onlar antioksidant və qidalandırıcı xüsusiyyətləri ilə seçilir. Lakin mütəxəssislərin fikrincə, bu məhsulların təsir mexanizmləri və sağlamlığa faydaları fərqlidir.

Qaynarinfo xəbər verir ki, "Verywell Health" portalının məlumatına görə, sarımsaq bəzi vitaminlər, minerallar, zülal və karbohidrat baxımından zəncəfildən daha zəngindir. Bununla belə, sarımsağın immunitet sistemini gücləndirdiyini təsdiqləyən yüksək keyfiyyətli elmi sübutlar hələ kifayət deyil.

Sarımsağın immunitetə təsiri

Sarımsağın tərkibində olan alliin maddəsi çeynənərkən, doğranarkən və ya əzilərkən allisinə çevrilir. Allisin isə qısa müddət ərzində digər kükürd tərkibli birləşmələrə parçalanır. Alimlərin fikrincə, bu maddələr soyuqdəymə və qrip viruslarına qarşı orqanizmin müdafiə reaksiyasını gücləndirə bilər. Lakin bu təsirin təsdiqlənməsi üçün əlavə araşdırmalara ehtiyac var.

Zəncəfilin immunitetə təsiri

Zəncəfil hüceyrələri oksidləşdirici stressin yaratdığı zədələrdən qoruyan antioksidantlarla zəngindir. Bu xüsusiyyət ürək-damar xəstəlikləri və bəzi xərçəng növləri kimi xroniki xəstəliklərin riskinin azalmasına kömək edə bilər.

Zəncəfilin əsas aktiv maddəsi olan gingerol soyuqdəymə və boğaz ağrısı kimi simptomların yüngülləşdirilməsinə kömək edə bilər.

Sarımsağın digər faydaları

Mütəxəssislər sarımsağın aşağıdakı potensial faydalarını qeyd edirlər:

* antibakterial təsir göstərə bilər;

* ateroskleroz və insult riskinin azalmasına kömək edə bilər;

* xolesterinin səviyyəsinin aşağı salınmasına dəstək verə bilər;

* arterial təzyiqin tənzimlənməsinə kömək edə bilər;

* antioksidant və iltihabəleyhinə təsir göstərə bilər;

* göbələk əleyhinə xüsusiyyətlərə malik ola bilər.

Zəncəfilin digər faydaları

Zəncəfilin mümkün faydaları bunlardır:

* ürəkbulanmanın azalmasına kömək edə bilər, baxmayaraq ki, tədqiqatların nəticələri birmənalı deyil;

* antioksidant təsir göstərir;

* həzmi yaxşılaşdırmağa kömək edir;

* köp, qəbizlik və digər həzm problemlərini yüngülləşdirə bilər;

* qanda şəkərin səviyyəsinin tənzimlənməsinə dəstək verə bilər;

* artrit zamanı ağrı və iltihabı azalda bilər;

* uzunmüddətli istifadə zamanı menstruasiya sancılarının yüngülləşməsinə kömək edə bilər.

Mümkün mənfi təsirlər

Çiy sarımsaq qarın ağrısı, köp, ürək yanması və ürəkbulanma kimi həzm sistemi narahatlıqlarına səbəb ola bilər. Sarımsaq, xüsusilə qida əlavəsi şəklində qəbul edildikdə, qan durulaşdırıcı preparatlarla birlikdə istifadə zamanı qanaxma riskini artıra bilər. Bundan başqa, ağız və bədən qoxusuna səbəb ola, bəzi insanlarda isə allergik reaksiyalar yarada bilər.

Zəncəfil də qarında narahatlıq, ishal, ürək yanması, ağız və boğazda qıcıqlanma kimi yan təsirlər yarada bilər. O da qan durulaşdırıcı preparatlarla qarşılıqlı təsir göstərə və yüksək dozada qəbul edildikdə qanaxma riskini artıra bilər. Həmçinin zəncəfil insulinin təsirini gücləndirərək qanda şəkərin səviyyəsini azalda bilər.

Aydın