ABŞ kəşfiyyatının
hesabatına görə, 2014-cü ildən bəri Rusiya xaricdə öz siyasi təsirini artırmaq
üçün ən azı 300 milyon dollar xərcləyib.
Qaynarinfo
xəbər verir ki, bu barədə CNN, "Reuters", "New York Times", "Washington Post" və digər nəşrlərə ABŞ prezident administrasiyasının adı çəkilməyən yüksək vəzifəli
şəxsləri məlumat verib.
ABŞ kəşfiyyatı
müəyyən edib ki, son səkkiz il ərzində Rusiya Federasiyası 20-dən çox ölkədə
xarici siyasi partiyaları, ayrı-ayrı siyasətçiləri və məmurları gizli şəkildə
maliyyələşdirib. Bəzi pul köçürmələrin diqqətdən kənarda qala biləcəyi güman
edilir. ABŞ-ın məlumatına görə, Rusiya hakimiyyəti bu cür maliyyələşdirməyə
daha yüz milyonlarla dollar xərcləməyi planlaşdırırmış.
Belə
ki, "Reuters" və CNN mənbələrinin məlumatına görə, Rusiya hakimiyyəti konkret
siyasi partiyaları, o cümlədən ifrat sağçı və millətçi partiyaları dəstəkləməyə,
həmçinin bu ölkələrin "demokratiyalarını daxildən manipulyasiya etməyə”
çalışıb. Eyni zamanda, nəşrlərin həmsöhbətləri konkret siyasətçilərin adlarını
və partiyaların adlarını açıqlamayıblar.
ABŞ kəşfiyyatının
müəyyən etdiyi kimi, köçürmələr üçün saxta şirkətlər, fondlar, beyin mərkəzləri,
Rusiya səfirliklərinin və dövlət müəssisələrinin hesabları və digər yollardan
istifadə edilib. Maliyyələşdirmə nağd pul, pul köçürmələri, kriptovalyutalar və
bahalı hədiyyələr şəklində baş verib və əməliyyatlara FSB, fiziki şəxslər və iş
adamları da daxil olmaqla Rusiya qurumları nəzarət edib. Rəsmilərin sözlərinə
görə, maliyyə sxemlərində iş adamı Yevgeni Priqojin və Rusiya Dövlət Dumasının
sədr müavini Aleksandr Babakov iştirak edib.
Jurnalistlərin
mənbələrinə görə, belə maliyyə vəsaiti Albaniya, Monteneqro, Madaqaskar,
Bosniya və Herseqovina və ola bilsin ki, Ekvadora da göndərilib. Bundan əlavə,
rəsmilər Rusiya səfirinin prezidentliyə namizədə milyonlarla dollar pulu nağd şəkildə
təhvil verdiyini deyərək adını açıqlamaqdan imtina etdikləri Asiya ölkəsindən
danışıblar. Eyni zamanda, hesabatda ABŞ-da mümkün Rusiya maliyyələşdirməsinə
dair məlumatlar əks olunmayıb.
ABŞ
Dövlət Departamentinin sözçüsü Ned Prays Rusiyanın gizli maliyyə əməliyyatlarını
"suverenliyə hücum” adlandırıb. "Bu, bütün dünyada insanları öz
maraqlarını və dəyərlərini təmsil etmək üçün ən uyğun hesab etdikləri hökumətləri
seçmək imkanından məhrum etmək cəhdidir", deyə ABŞ rəsmisi bildirib.
Dövlət
Departamenti kəşfiyyat məlumatlarını dünyanın 100-dən çox ölkəsindəki ABŞ səfirliklərinə
göndərib. Sənəddə Rusiyanın iddia edilən gizli fəaliyyətləri ilə bağlı məlumatlardan
əlavə, ABŞ və müttəfiqlərinin Kremlə qarşı duruş gətirmək üçün atacağı addımlar
təklif edilir. Bunlara sanksiyalar, səyahət qadağaları və casusluqda və gizli
siyasi maliyyələşmədə şübhəli bilinən şəxslərin ölkədən çıxarılması daxildir.
Ukraynadakı
müharibənin fonunda, yaxın aylarda Rusiya sanksiyaların effektivliyini
sarsıtmaq və ABŞ-a qarşı təsirini saxlamaq üçün Mərkəzi və Cənubi Amerika,
Afrika, Yaxın Şərq və Asiyada xarici siyasətçilərin və partiyaların maliyyələşdirilməsi
də daxil olmaqla, gizli təsir alətlərinə daha çox etibar edə bilər.
"Rusiyanın
siyasətçiləri gizli şəkildə maliyyələşdirməsini və demokratik proseslərə xələl
gətirmək cəhdlərini işıqlandırmaqla biz bu xarici partiyaların və namizədlərin
diqqətini ona yönəldirik ki, əgər onlar gizli şəkildə Rusiya pullarını qəbul
etsələr, biz onları ifşa edə bilərik və ifşa edəcəyik", - CNN ilə danışan
ABŞ rəsmisi bildirib.
