ABŞ prezidenti Donald Trampın emissarlarının Moskvada Rusiya lideri Vladimir Putinlə beş saatlıq görüşündən sonra onlar, görünür, heç bir nəticə əldə etmədən geri qayıdıblar.

Qaynarinfo xəbər verir ki, bu sözləri CNN yazır.

Putinin köməkçisi Yuri Uşakov görüşdən sonra çıxaraq 27 bəndlik planı və daha dörd sənədi qeyd edib. CNN-in fikrincə, bu detalları açıqlamaq böyük ehtimalla yaxın vaxtlarda 20 bəndlik planı xatırladan və qalan üç sənədin məzmununa nəzarət etməyə ümid edən Ukrayna prezidenti Vladimir Zelenskini qıcıqlandırmağa hesablanmışdı.

"Lakin diplomatiyanın son mərhələsi əsasən səssizlikdə keçir və Zelenskinin sevinməsi üçün elə də əsas yoxdur… Trampın Şükran Günü üçün təyin etdiyi ‘təcili razılaşma’ son tarixi indi ilğıma çevrilib, qarşıda isə soyuq, qonaqpərvər olmayan bir səhralıq görünür”, – deyə CNN qeyd edir.

CNN-in yazdığına görə, Tramp bu müharibənin mümkün qədər tez bitməsini istəməkdə haqlıdır. Lakin bu, onun Putini və onun əsas məqsədini – qlobal təhlükəsizlik balansını yenidən qurmaq və ABŞ-ın uzun illər davam edən hegemonluğuna son qoymaq hədəfini – fundamental şəkildə anlamamasından irəli gəlir:

"Putin hər şeyə qadir deyil və ölkə daxilində kadr və büdcə təzyiqləri ilə üz-üzədir. Lakin onu nə korrupsiya araşdırmaları, nə aralıq seçkilər, nə də növbəsini gözləyən varislər narahat edir. O, Rusiya sənaye kompleksini sərt şəkildə hərbi relslərə keçirib və demobilizasiya ilə bağlı kifayət qədər ciddi planlara malikdir. Bir çox baxımdan müharibənin davam etməsi Putinin hakimiyyətdə qalması üçün ən yaxşı şansdır”.

Putinin köməkçisi Uşakov bildirib ki, təklif olunan razılaşmanın bəzi elementləri qəbulediləndir, bəziləri isə kəskin şəkildə tənqid olunub. CNN yazır ki, görünür, Ukrayna prezidenti Vladimir Zelenski Kreml görüşündən əvvəl gizli şəkildə müəyyən ərazi güzəştlərini müzakirə edirmiş və bununla da müharibənin "qırmızı xəttini” yumşaldırmış. Lakin Kiyevdən hansı güzəştlərin verilə biləcəyi tam məxfi saxlanılıb ki, bu da Zelenskini gələcək danışıqlar üçün əlverişsiz başlanğıc nöqtəsinə salmasın.

Bununla belə, Uhitkoff hansı "şirinləşdiricilərdən” istifadə etsə də, Putin razılaşmanı qəbul etməyib.

CNN-in qeyd etdiyinə görə, Putin hərbi cəhətdən – yavaş, lakin ardıcıl – irəliləyir və Ukraynanın kadr çatışmazlığı, maliyyə problemləri və daxili siyasi böhran səbəbilə zəiflədiyini görür.

Mübarizə və yavaş-yavaş qazanılan qələbə Putinə həzz verir və o, qarşıda bunun daha çox olacağına inanır. Bu isə, böyük ehtimalla, real və davamlı sülhü mümkünsüz edir, – deyə CNN yekunlaşdırır.

Bundan əvvəl Müharibə Araşdırmaları İnstitutu (ISW) açıqlamışdı ki, Vladimir Putin 2 dekabrda ABŞ nümayəndə heyəti ilə Moskvada görüş zamanı faktiki olaraq Vaşinqtonun sülh təklifini rədd edib. O, Ukrayna ilə bağlı əsl niyyətlərini ABŞ administrasiyasından gizlətməkdə davam edir.

Öz növbəsində ABŞ prezidenti Donald Tramp görüşü "yaxşı” adlandırsa da, bunun hər hansı nəticə verəcəyinə şübhə etdiyini bildirib.

Alpər