ABŞ Prezidenti Donald Tramp İran İslam Respublikasının təklifi
qəbul edəcəyi təqdirdə Birləşmiş Ştatların İrana koronavirusun yayılması ilə
mübarizədə kömək edə biləcəyini deyib.
Qaynarinfo xəbər verir ki, o, bu barədə "Fox News"a
verdiyi müsahibədə bildirib.
Trampa görə, Birləşmiş Ştatlar koronavirusla çox uğurlu
mübarizə aparır və Maykl Pensin rəhbərlik etdiyi mükəmməl koronavirus qrupu
var. Amerika lideri ABŞ-ın dünyada ən yaxşı həkimlərə sahib olduğunu da qeyd edib.
O, ABŞ-ın bu xəstəliyə qarşı mübarizədə bir çox ölkəyə kömək etdiyini və yeni
koronavirusun təsirinə məruz qalan İrana da kömək edə biləcəyini ifadə edib.
Bundan əvvəl ABŞ-ın dövlət katibi Maykl Pompeo Amerika tərəfinin
İrana koronavirusla mübarizədə yardım təklif etmiş, lakin İran Xarici İşlər
Nazirliyi Vaşinqtonun təklifini gülünc adlandırmışdı.
Xatırladaq ki, Çindən kənarda koronavirusa ən çox yoluxanlar
Cənubi Koreya, İran və İtaliyada qeydə alınıb.
