Türkiyə Suriya əməliyyatından əvvəl Rusiya və ABŞ-a ultimatum verdi

Qaynarinfo xəbər verir ki, bu barədə "Əl-Cəzirə” Türkiyə mənbəsinə istinadən yazır. Sayt qeyd edib ki, bu halda Ankara Suriyadakı quru hərbi əməliyyatından imtina edəcək.

Mənbənin sözlərinə görə, Türkiyə kürd qüvvələrinin bu şəhərləri tərk etməsi üçün son tarix qoyub. Qeyd edilib ki, Birləşmiş Ştatlar alternativ təklif edib: Suriya Demokratik Qüvvələrinin alyansının yenidən qurulması və ərəb əhalisinə Menbic, Tel-Rifat və Ayn əl-Ərəbin idarə olunmasında daha böyük rol vermək.

Digər tərəfdən, Rusiya da Türkiyəyə qarşı şərtlər irəli sürür. "Türkiyənin Ukrayna ilə bağlı müəyyən addımları müqabilində Rusiya Suriyada siyasi güzəştlərə getməyə hazırdır", deyə kanalın mənbəsi deyir. 

Lakin o, Ankaranın hansı addımlar atmalı olduğunu dəqiqləşdirməyib. "Əl-Cəzirə” mənbəsi əlavə edib ki, onların həyata keçirilməsi ilə Rusiya Türkiyə tərəfindən qoşunların ölkəyə daxil olmasını asanlaşdırmaq üçün Hələb və Ayn əl-Ərəbdəki bəzi ərazilərdə nəzarəti aradan qaldırmağa razılaşıb.

Türkiyə noyabrın 20-də Suriyanın şimal və şimal-şərqində PKK/PYD qruplaşmasına qarşı "Qılınc pəncəsi” əməliyyatına başlayıb. Ankara noyabrın 13-də İstanbulda piyadalar üçün nəzərdə tutulmuş İstiqlal küçəsində törədilən terror aktında PKK-nı günahlandırıb. PKK isə ittihamları rədd edib.

Türkiyə Hələb, Əl-Həsaki və Rakka əyalətlərinin kəndlərində kürd birləşmələrinin mövqelərinə hava və artilleriya zərbələri endirib. Prezident Rəcəb Tayyib Ərdoğan Türkiyə hərbçilərinin tezliklə quru əməliyyatına başlayacağı ilə bağlı xəbərdarlıq edib.

"Quru qoşunlarının nə qədər qüvvəsi əməliyyata cəlb olunacağına bizim müvafiq bölmələrimiz, Müdafiə Nazirliyi və Baş Qərargah birlikdə qərar verəcək. Məsləhətləşəcəyik, sonra müvafiq addımlar atacağıq. Biz burada olan ölkələrlə artıq diplomatik əlaqələr qurmuşuq, müvafiq addımlar atmışıq və atırıq”, deyə Türkiyə lideri bildirib.

Ərdoğan həmçinin Rusiyanı regionda üzərinə götürdüyü öhdəlikləri yerinə yetirməməkdə ittiham edib. O xatırladıb ki, 2019-cu il Soçi razılaşmasına əsasən, Rusiya Şimali İraq və Suriyanın terrorçulardan təmizlənməsinə cavabdehdir. "Onlar ərazini terrorçulardan təmizləməyə borclu idilər. Təəssüflər olsun ki, bunu onlara dəfələrlə xatırlatmağımıza baxmayaraq, onlar bunu etmədilər”, deyə Türkiyə lideri "Daily Sabah” qəzetinə müsahibəsində bildirib.

Söhbət Vladimir Putinlə Ərdoğanın görüşündə əldə olunan razılaşmadan gedirdi. Onun sözlərinə görə, bölgədə atəşkəs yaradılıb, Rusiya və Türkiyə birgə hərbi patrul həyata keçirməli idi. Bundan əlavə, kürd qüvvələri Türkiyə sərhədi boyunca geri çəkilməli idi. Onların geri çəkilməsinə Rusiya hərbi polisi və Suriya sərhəd xidməti kömək etməli idi.