Ukrayna qarşıdakı əks-hücum zamanı 30 milyard dollardan çox silahdan istifadə edəcək. Bu, Birləşmiş Ştatlar istisna olmaqla, NATO üzvü olan istənilən ölkənin bir ildə silaha xərclədiyi məbləğdən çoxdur. Bunun kifayət edib-etməyəcəyi hələ bilinmir.
Qaynarinfo bu barədə "Bloomberg"ə istinadən xəbər
verir.
Uğur qazanmaq üçün Ukrayna hava üstünlüyü olmadan mürəkkəb ümumqoşun döyüş əməliyyatı keçirməli olacaq. Qeyd olunur ki, dünyada az sayda hərbçi bunun üçün lazımi hazırlığa malikdir.
Bu, Ukraynanın dekabr ayından aldığı 200-dən çox tank, 300 piyada döyüş maşını və digər silahların təsirini maksimuma çatdırmaq üçün piyada, zirehli texnika, istehkamçılar və hava hücumundan müdafiə vasitələrinin əlaqələndirilməsi deməkdir.
Eyni zamanda, ukraynalı komandirlər gözləntiləri aşağı salıb və dəfələrlə silahların, o cümlədən hava hücumundan müdafiə və uzaq mənzilli raketlərin sayını artırmağa çağırıblar.
Hərbi analitiklər hesab edirlər ki, Ukrayna Silahlı Qüvvələrinin uğuru silahlardan daha çox təlim, kəşfiyyat və Ukraynadan üstün olan Rusiya aviasiyasına qarşı duruş gətirmə qabiliyyətini əhatə edən amillərdən asılı olacaq.
Həmçinin qeyd edilir ki, Ukrayna yalnız kiçik nailiyyətlərə nail ola bilsə, bu, növbəti dalana və atəşkəs sazişi çərçivəsində işğal olunmuş əraziləri qaytarmaqdan imtina etməsi üçün Kiyevə təzyiqin artmasına səbəb ola bilər.
Nizami Bağırov
