Ukraynaya dəstək ABŞ-ın müdafiə sənayesi bazasını səfərbər edib. Onilliklərdir ki, ölkədə belə hal müşahidə olunmur.
Qaynarinfo xəbər verir ki, bu barədə ABŞ Müdafiə Nazirliyinin bəyanatında
deyilir.
ABŞ Müdafiə Nazirliyi müdafiə podratçılarına həm mövcud istehsal xətlərini genişləndirmək, həm də modernləşdirmək və tamamilə yenilərini yaratmaqda kömək etmək üçün 18 ştatda təxminən 3,3 milyard dollar ayırıb. Podratçılar, digər silahlarla yanaşı, 155 mm-lik artilleriya mərmiləri, idarə olunan çoxsaylı buraxılış raket sistemləri, "Stinger" və "Javelin" raketləri istehsal edirlər.
ABŞ Müdafiə Nazirliyi yeni avadanlığın yaradılması və xaricə göndərilənlərin dəyişdirilməsi, həmçinin Ukraynaya göndəriləcək yeni avadanlıqların istehsalı üçün 10 milyard dollardan çox vəsait ayırıb.
Ümumilikdə, Müdafiə Nazirliyi 37 ştatda təchizatçılara dəyəri 27 milyard dollardan çox avadanlıq sifariş edib.
"2022-ci il fevralın 24-də Rusiyanın işğalından bu yana ABŞ Ukraynaya təhlükəsizlik məqsədilə təxminən 44 milyard dollar yardım edib. Yardım ya prezidentin ixtisar səlahiyyətləri vasitəsilə, yəni avadanlığın ordunun ehtiyatından çıxarılaraq xaricə göndərilməsi, ya da Ukrayna Təhlükəsizliyə Yardım Təşəbbüsü vasitəsilə - Ukraynaya yeni avadanlıq göndərmək üçün sənaye ilə birbaşa müqavilə bağlamaqla təmin edilib.
Aktivlər ABŞ-ın mövcud inventarından çıxarıldıqda, ABŞ ordusunun öz hazırlığını qorumaq üçün onlar dəyişdirilməlidir. Noyabrın ortalarına olan məlumata görə, nazirlik ABŞ anbarlarından Ukraynaya göndərilən avadanlıqların əvəz edilməsi üçün təxminən 17 milyard dollar ayırıb”, deyə bəyanatda bildirilir.
"Ümumilikdə, ABŞ sənaye bazamızın Ukraynanın müdafiə ehtiyaclarını ödəmək üçün verdiyi reaksiya həqiqətən tarixi olub. Bu, təchizat zəncirlərimizin bütün spektrini əhatə edən milli səydir. Müasir müdafiə sənayesi ekosistemini tam şəkildə yenidən qurmaq üçün qarşımızda hələ də əhəmiyyətli işlərin olduğuna şübhə olmasa da, son 21 ay ərzində sənaye tərəfdaşlarımızla nəyə nail ola bildiyimizi unutmamalıyıq", deyə ABŞ Müdafiə Nazirinin Satınalma və Dayanıqlıq üzrə müavini Uilyam LaPlanten bildirib
Nizami Bağırov
