21 yaşlı Saveliy Fedan "X-factor” istedad şousunun doqquzuncu mövsümünün iştirakçısı, Enerqodardan olan ukraynalı müğənnidir. Genişmiqyaslı müharibə başlayandan mikrofonu silaha çevirib.
Qaynarinfo xəbər verir ki, il yarımdan artıq cəbhədə doğma vətəninin azadlığı və müstəqilliyi uğrunda vuruşsa da, bu gün onun qəhrəmancasına həlak olması məlum olub.
Enerqodar şəhərinin meri Dmitri Orlov Fedanın ölümü ilə bağlı danışıb. O yazıb ki, Saveli həmişə ölkəsinin gələcəyinə inanır, ona görə də zərrəcə şübhə etmədən cəbhəyə yollanıb.
"Biz Saveliyi belə xatırlayacağıq: sarsılmaz şərəf koduna malik istedadlı və parlaq gənc, Ukraynanın səmimi vətənpərvəri, hər zaman ölkəsinin gələcəyinə inanan və onu müdafiə etməkdən çəkinməyən", - Orlov deyib.
Məlumdur ki, Saveliy əvvəlcə Zaporojye Regional Liseyində "Müdafiəçi" təkmilləşdirilmiş hərbi-fiziki hazırlığında oxuyub, sonra Odessa Hərbi Akademiyasının hava-desant hücum qoşunlarının mütəxəssislərinin hazırlanması fakültəsinə daxil olub və tam kursa başladıqdan sonra o, cəsarətlə Ukraynanın müdafiəsi üçün ayağa qalxıb.
"O, dünyada cəmi 21 il yaşadı... Qarşıda onu uzun və xoşbəxt bir həyat gözləyirdi. Amma oğlanın ömrünü müharibə yarımçıq kəsdi, onu torpaqlarımıza gələn canavarlar apardılar. İtkinin acısını paylaşır, ailəsinə və yaxınlarına dərin hüznlə başsağlığı veririk”, - bələdiyyə sədri əlavə edib.
Qeyd edək ki, Saveli ilk dəfə 13 yaşında cəbhəyə gedib. O, könüllülərlə birlikdə əsgərliyə gedib, mahnıları ilə onların ruh yüksəkliyini qaldırıb. 16 yaşında o, Donbas səfərindən sonra yazdığı "Ukrayna" mahnısını ifa etdiyi "X-factor" şousuna gəlib.
Münsiflər Savelinin istedadına heyran qalıb, ona görə də yekdilliklə ona "Bəli” deyiblər. Lakin gənc sənətçi Rusiya Federasiyasının işğalı səbəbindən şou-biznesdə uğurlu karyera qura bilməyib.
Bundan əvvəl məşhur ukraynalı aktyor Aleksey Xilski işğalçılarla ağır döyüşdə həlak olub.
