ABŞ-ın Mərkəzi Kəşfiyyat İdarəsi illik təhdid hesabatını təqdim edib və bu hesabatda Moskvanın "asimmetrik fəaliyyətlərini” davam etdirəcəyini, lakin birbaşa münaqişəyə girməyə cəsarət etməyəcəyini bildirib. MKİ-nin gəldiyi nəticələr Ukraynanı məyus edir: Qərb onu dəstəkləmək üçün vəsait tapmasa, o, öz ərazilərinin əhəmiyyətli hissəsini itirə bilər. Yardım Avropadan gələ bilər - onlar Rusiyanın dondurulmuş aktivlərindən gəlirləri Kiyevə köçürməyə hazırlaşırlar.

Qaynarinfo bununla bağlı xarici mətbuatın icmalını təqdim edir.

ABŞ kəşfiyyat rəsmiləri təhlükəsizlik təhdidləri ilə bağlı Konqresə hesabat verərkən tez-tez sərt qiymətlər verirlər. "Bloomberg" yazır ki, illik hesabatın növbəti təqdimatı da istisna olmayıb. Sənəddə deyilir ki, Rusiya 2023-cü ilin sonundan bəri döyüş meydanında ardıcıl uğurlar əldə edir və Qərbin hərbi yardımının qeyri-müəyyənliyindən bəhrələnir. Bu ona strateji üstünlük verir və "vəziyyəti getdikcə daha çox Moskvanın xeyrinə dəyişir”. Eyni zamanda, uzunmüddətli münaqişəyə imkan verən silah və sursat istehsal sürətini artırıb.

Mərkəzi Kəşfiyyat İdarəsinin direktoru Uilyam Börns qeyd edib:

"Ukraynalılar cəsarət və əzmkarlıqlarını itirmirlər. Onların döyüş sursatı tükənmək üzrədir və bizim onlara kömək etməyə vaxtımız yoxdur”. O, xəbərdarlıq edib ki, ABŞ-ın köməyi olmadan Ukrayna "qaranlıq gələcək”lə üz-üzədir və bu il "çox güman ki, ərazilərini, görünən odur ki, əhəmiyyətli ərazilərini” itirəcək.

Milli Kəşfiyyatın direktoru Evril Heyns deyib: "Kiyevin Rusiyadan geri aldığı torpaqları necə saxlayacağını təsəvvür etmək çətindir”. "The Guardian"ın yazdığı kimi, o, Ukraynaya 60 milyard dollar ayrılması haqqında qanun layihəsinin tezliklə qəbul edilməsinin vacibliyini qeyd edib. Təşəbbüs Senat tərəfindən bəyənilib, lakin Nümayəndələr Palatası sənədi hələ ki, səsverməyə çıxarmayıb.

"NBC News"un verdiyi məlumata görə, onlar alternativ qanun layihəsi hazırlayırlar - kreditlərlə kömək göstərmək təklif olunur və müsadirə edilmiş Rusiya aktivləri girov kimi istifadə edilə bilər.

Bu arada Avropa İttifaqı iyulda Rusiyanın dondurulmuş aktivlərindən əldə edilən ilk 2-3 milyard avronu Ukraynaya köçürməyə hazırlaşır. "Financial Times"ın məlumatına görə, Avropa Komissiyası yaxın vaxtlarda belə bir təklif təqdim edəcək. Əgər əvvəlcə söhbət Ukraynanın bərpasından gedirdisə, indi hərbi yardım üçün vəsaitdən istifadə imkanları müzakirə olunur. Lakin bu təklif bəzi ölkələrin, o cümlədən Macarıstanın müqaviməti ilə qarşılaşacaq.

Nizami Bağırov