Ukrayna prezidenti Volodimir Zelenski hesab edir ki, Vladimir Putin özünü İkinci dünya müharibəsi zamanı nasist Almaniyasının başçısı Adolf Hitler kimi aparır və ukraynalılar, digər xalqlar tərəfindən bağışlanmayacaq.
Qaynarinfo xəbər verir ki, Ukrayna dövlətinin başçısı bu barədə Spiegel-ə verdiyi müsahibəsində
bildirib.
Ukrayna prezidenti Volodimir Zelenski müsahibədə bunları deyir: "Ukraynalılar Putini bağışlamayacaq və dünyanın əksər ölkələri Rusiyanın indiki rəhbərliyinin üzərindən çoxdan xətt çəkiblər.
Bu, mənə Hitlerin sonunu xatırladır: o, dünya müharibəsində uduzanda hələ də Londonu bombalamağa davam edirdi. O, axmaq olmasa da, bunu etdi.
Sadəcə başa düşməlisiniz: aramızda həm siyasi, həm də tarixi uçurum var. Bu, dünyagörüşü məsələsidir. Onun (Putinin - red.) dünyagörüşünün nəticəsi isə belədir: dağıdılmış ərazilər, beynəlxalq hüquqa, insan hüquqlarına məhəl qoymamaq, bütün canlılara etinasızlıq. Onun üçün nə qədər adamı ölümə göndərməsi maraqlı deyil, əsas öz yeri uğrunda mübarizə aparmasıdır”.
Zelenskinin fikrincə, Rusiyanın hazırkı prezidentini dayandırmaq mümkün deyil, "çünki Putin yeməyə ehtiyacı olan əjdahadır: onun iştahını doyurmaq üçün ona bir-birinin ardınca ölkələri və ya heç olmasa onların bir hissəsini verirsən”.
Ukrayna lideri əmindir ki, müasir dünyada nə sərhədlər, nə də okeanlar rusiyalıları dayandıra bilməz.
Zelenski danışır ki, Rusiya işğalından sonra hər gün Avropa liderləri ilə danışıb və deyib: "Ona zəng edin, onu dayandırın, onun qoşunlarını dayandırın”.
Ukrayna prezidenti: "Xəbərdarlıq etmişdim: bizə çoxlu silah verin. Mən həm də qabaqlayıcı tədbir kimi silah və sanksiyalardan istifadə etməyə çağırdım.
Əgər hamı bilirdi ki, Putin ölkəmizi işğal edəcək, niyə sanksiyalar tətbiq etmədilər? Sizin hamınızın bizim üçün açıq şəkildə tərəf saxlamağınız, lakin hələ də sanksiyalardan yayınmağınız və ya silah verməkdən imtina etməyiniz tamamilə gülüncdür.
Mən bunu çirkli siyasət kimi görürəm: siz bilirsiniz ki, Rusiya bu müharibəni tarixən uduzur, lakin Rusiyanın 1% qalib gəlmə ehtimalını nəzərə alaraq Ukraynaya kömək etməkdən hələ də imtina edirsiniz. Çünki o zaman Putinə deyə biləcəksiniz: "Yadınızdadırmı? Onda bir az yavaşlamışdım!" Siyasətdə mənim xoşuma gəlməyən şey budur: dəyərlər haqqında danışın və sonra öz hərəkətlərinizlə onları dəyərsizləşdirin”.
Berlinin siyasətindən məyus olub-olmadığını soruşduqda, Zelenski cavab verib ki, "Almaniya ilə münasibətlər dalğavaridir: gah yüksəlir, gah enir".
Prezidentin sözlərinə görə, əvvəlcə temperamentlər və qərarların sürəti fərqli olduğuna görə onun üçün çox çətin idi, lakin zaman keçdikcə "mühafizəkar münasibət dəyişdi", o, Almaniya kansleri Olaf Şolts və Frank-Valter Ştaynmayerdən dəstək aldı, sonuncu ilə "əvvəllər çətinliklər var idi, xüsusən də Ştanmayer formuluna görə.
"Məndən incidiyini hiss etdiyim dövlət başçısına dedim - və deməliyəm ki, bu, Olaf (Şolts) deyildi - on tankın verilməsinin mənası yoxdur. Mən aşağıdakıları nəzərdə tuturdum: söhbət tankların sayından getmir və bunun üzərində bazarlıq etməyin mənası yoxdur. Bu, sanksiyalar kimi daha çox siyasi qərardır. Tankların çatdırılması yalnız o deməkdir ki, biz hamımız Rusiyanın təcavüzünə qarşı birik. Sabah artıq tank deyil, təyyarələr olacaq və ya başqa bir şey", - Zelenski izah edir.
"Mən Olafı (Şolts) Ukraynaya yardım etməyə məcbur edirəm və onu daim inandırıram ki, bu yardım bizim üçün deyil, avropalılar üçündür. Rusiyalılar sərhədinizdə olan kimi siz öz insanlarınızın həyatını qurban verməli olacaqsınız. Ona görə də Ukraynanın bu gün gördüyü işlər sizin ölkəniz üçün daha sərfəlidir", - deyə Zelenski digər ölkələrin liderlərinə arqumentlərini açıqlayıb.
Nizami Bağırov
