ABŞ, Almaniya və Macarıstan, Polşa və Baltikyanı ölkələrin təkidinə baxmayaraq, iyul ayında keçiriləcək sammitdə Ukraynaya NATO-ya üzvlük üçün "yol xəritəsi” təklif etmək fikrinə qarşıdır.
Qaynarinfo xəbər verir ki, bu barədə "Financial Times” dörd mənbəyə istinadən
yazır.
FT həmsöhbətlərinin bildirdiyinə görə, mart ayında NATO-nun baş katibi Yens Stoltenberq üzv ölkələrə Kiyev üçün "praktiki və siyasi” təklifləri olan sənəd təqdim edib. Danışıq aparanlar bildiriblər ki, NATO xarici işlər nazirləri bu yaxınlarda Brüsseldə keçirilən görüşdə Ukraynaya nə təklif ediləcəyi ilə bağlı qızğın müzakirələr aparıblar. Qərb rəsmilərindən biri bildirib ki, müttəfiqlər siyasi nəticə əldə etməzdən əvvəl "bir neçə həftəlik gərgin danışıqlarla” üzləşəcəklər.
FT-nin məlumatına görə, Şimali Atlantika Alyansının bütün üzvləri tam miqyaslı müharibənin davam etdiyi bir vaxtda Ukraynanın NATO-ya üzvlüyünün müzakirə oluna bilməyəcəyi ilə razılaşır. Eyni zamanda, danışıqlarda iştirak edən iki nəfərin sözlərinə görə, daha çox insan Ukraynanın Vilnüs sammitinə qoşulmaq üçün Kiyevin Alyansla əlaqələrini gücləndirəcək "siyasi yol” təklifini dəstəkləyir.
Nəşrin yazdığına görə, ABŞ bu təklifə qarşı çıxır və müttəfiqlərini Rusiyanın tammiqyaslı işğalını dəf etmək üçün Ukraynaya qısamüddətli hərbi, maliyyə və humanitar yardıma diqqət yetirməyə çağırır.
FT-nin iddiasına görə, Vaşinqton narahatdır ki, müharibə zamanı əlaqələrin dərinləşməsi Rusiya prezidenti Putinin NATO-Rusiya "müharibə” narrativlərini gücləndirə və Moskva nüvə silahlarının yerləşdirilməsi də daxil olmaqla eskalasiyaya gedə bilər.
Materialda deyilir ki, nəzərdən keçirilən variantlardan biri NATO-Ukrayna Komissiyasının NATO-Ukrayna Şurasına çevrilməsi, bununla da Ukraynanın Alyansın tərəfdaşı statusunun yüksəldilməsi və onu NATO-nun iclas və məsləhətləşmələrinin daha fəal iştirakçısına çevirməkdir.
NATO-nun növbəti sammiti iyulun 11-12-də Vilnüsdə keçiriləcək. Burada Alyansa üzv və tərəfdaş ölkələrin 40-a yaxın nümayəndə heyəti iştirak edəcək.
Nizami Bağırov
