Ağ Ev rəsmiləri ABŞ Nümayəndələr Palatasının sədri Kevin Makkartinin istefasından və 2024-cü il üçün maliyyə paketinin qəbulu ilə bağlı problemlərdən sonra təcili olaraq Ukraynaya dəstək strategiyası hazırlayır.
Qaynarinfo xəbər verir ki, bu barədə Washington Post yazır.
Nəşrin yazdığına görə, ABŞ prezident administrasiyası artıq Ukrayna üçün hökumətin qısamüddətli maliyyələşdirilməsinə dair sazişə daxil edilməsi istənən 24 milyard dollar məbləğində əlavə maliyyə vəsaitinin ayrılmasını tələb etmir, - yüksək vəzifəli məmurlardan biri deyib.
Ağ Ev hazırda iki variantı müzakirə edir. Birincisi, prezident seçkiləri ilində əlavə səsvermənin qarşısını almaq üçün 2024-cü ilin sonuna qədər Ukraynaya daha böyük yardım paketinin hazırlanmasına təkan verməkdir. İkincisi, Konqresdən keçmək şansı daha yüksək olan daha kiçik, qısamüddətli yardım paketini irəli sürməkdir.
Eyni zamanda, rəsmilər Ukraynanın təcili döyüş ehtiyaclarını ödəmək üçün indi kifayət qədər səlahiyyətə malik olduqlarını deyirlər, lakin bunun nə qədər davam edəcəyi bəlli deyil.
Üstəlik, Nümayəndələr Palatasının spikeri vəzifəsinə əsas namizədlər arasında Ukraynaya dəstək üçün xərclərin artırılmasının əleyhinə olanlar da var.
Nizami Bağırov
