Alimləri heyrətə salan hadisə: Üç "Qiyamət balığı" sahilə çıxdı

Qaynarinfo xəbər verir ki, bu barədə "Sustainability Times" yazıb.

Uzunluğu 8 metrə çatan və dənizin dərin qatlarında yaşayan vеslonos balıqları nadir hallarda insan gözünə görünür. Onların yer səthinə çıxması adətən istisna hal hesab olunur. Yeni Zelandiyanın "Te Papa Tonqareva” muzeyinin balıq kuratoru Endryu Stüart bu balıqları "məhz qeyri-adi və möhtəşəm” adlandıraraq bildirib ki, onların sahildə görünməsi son dərəcə nadir hadisədir. Muzey azı bir nümunəni tədqiqat üçün əldə etməyə ümid etsə də, təəssüf ki, vəhşi heyvanlar balıqlara ziyan vurduğu üçün bioloji analizlər üçün dəyərli materiallar əldə olunmayıb.

Yaponiyada bu balıqların peyda olması zəlzələ və sunami kimi təbii fəlakətlərə öncədən xəbərdarlıq kimi qəbul olunur. Lakin alimlər – o cümlədən Yeni Zelandiyanın Vaykato Universitetindən ekolog Nik Linq – bu fikirləri elmi cəhətdən əsaslandırılmamış sayır. Onun sözlərinə görə, bu balıqların zahiri görünüşü və nadir hallarda görülməsi onları əfsanələrin mərkəzinə çevirib, lakin bu yalnız onların dənizin əlçatmaz dərinliklərində yaşaması ilə izah olunur.

Sahilə çıxan üç balığın ardıcıl şəkildə tapılması bəzi müşahidəçilər üçün "dənizlərin mesajı" kimi görünsə də, alimlər bu hallar qarşısında panika əvəzinə elmi maraqla yanaşmağa çağırırlar. Vеslonoslar hələ də okeanın ən az öyrənilmiş canlıları sırasındadır və hər yeni nümunə Yer planetinin dərinliklərində baş verən prosesləri daha yaxşı anlamaq üçün əvəzolunmaz fürsətdir.