Alman iş adamı və Almaniya üçün Alternativ sağ populist partiyasından olan Saksoniya parlamentinin deputatı Yorq Dornau Belarusda biznes qurub. O, burada belaruslu siyasi məhbuslardan işçi kimi istifadə edib.

Qaynarinfo xəbər verir ki, bu barədə Reform.news yazıb.

Nəşrin məlumatına görə, alman siyasətçi Lida şəhəri yaxınlığında soğan plantasiyası yaradıb və Belarusdakı "Cinayətkarların Təcrid Mərkəzi" (CIP) ilə bu plantasiyada işləməyə yerli siyasi məhbusları mütəmadi olaraq təchiz etmək üçün müqavilə bağlayıb.

Qeyd olunur ki, jurnalistlər "Cybulka-Bel" MMC-də Yorq Dornau üçün soğan çeşidləyən siyasətçilərdən birini tapıblar. Rejimli müəssisədən kənd təsərrüfatı işlərinə göndərilən təkcə Andrey (ad şərtidir) olmayıb, lakin öz hekayəsini danışmağa cəsarət edən yeganə şəxs məhz o, olub.

Andrey 2024-cü ilin fevralında saxlanılıb və sosial şəbəkələrdə paylaşımı bəyəndiyinə görə 15 sutka müddətinə CIP-ə göndərilib. Onun sözlərinə görə, "Cybulka-Bel" və CIP arasında subpodrat müqavilə imzalanıb, qazanılan pullar CIP-də texniki xidmətə getməli imiş. Hər gün işləmək üçün razılıq imzalamaq lazım olub və qazanclar məhbusun nə qədər yaxşı işləməsinə qərar verən briqadirin qərarı ilə ödənilib. Siyasi işçilər soyuqda, səhər saat 7-dən axşam 6-ya kimi yeməksiz, içkisiz işləyiblər.

"Lida-ya hər məhbus üçün 30 rubl (Belarus valyutası), məhbusların özlərinə isə təxminən 20 rubl ödənilirdi. Soğan "Evroopt" pərakəndə şəbəkəsi üçün çeşidlənib", deyə Andrey bildirib.

O, alman fermeri şəxsən gördüyünü iddia edir: "Ucaboy, keçəl adam idi. Bir dəfə alman qeydiyyatında olan maşını ilə gəldi. Anbara daxil olanda muzdlu işçilərlə birlikdə soğan çeşidləyirdik".

Reform.news xəbər verir ki, 53 yaşlı Yorq Dornau Born (Saksoniya) şəhərində anadan olub, kənd təsərrüfatı təhsili alıb və sahibkarlıqla məşğuldur. 2016-cı ildə Rusiyayönlü sağçı Almaniya üçün Alternativ Partiyasına qoşulub, 2019-cu ildən Saksoniya parlamentinin üzvü seçilib, kənd təsərrüfatı siyasəti üzrə parlament qrupundan təmsil olunub. Dornau həm də partiyanın ekstremist radikal fraksiyasının - "Krılo"nun üzvü olub.

"Alman siyasətçisi Belarusda "Cybulka-Bel" MMC kənd təsərrüfatı müəssisəsinin sahibi olduğu üzə çıxandan sonra federal alman mediasının manşetlərinə düşüb. Onun təsərrüfatında Lida rayonunda bir neçə yüz hektar sahədə soğan və digər tərəvəzlər becərilir. Saksoniya parlamenti haqqında qanuna görə, deputatlara biznes fəaliyyəti ilə məşğul olmaq qadağan edilmir. Lakin Yorq Dornau Belarusdakı biznesini gizlədib, bununla da hesabat öhdəliklərini pozub. Nəticədə, 2024-cü ilin avqustunda Saksoniya parlamenti onu 20 862 avro cərimələyib", deyə nəşr yazır.

Qeyd olunur ki, Belarusun dövlət mediası yüksək rütbəli məmurlarla görüşən və hakimiyyətin himayəsində olan alman haqqında tez-tez yazır. O, "Cybulka-Bel" MMC-ni 2020-ci ilin oktyabr ayında Qrodno vilayətinin Lida rayonunun Hudı kəndində qeydiyyatdan keçirib. Ona 1555,4 hektar torpaq sahəsi sahibkarlıq fəaliyyəti üçün daimi istifadəyə verilib.

Lukaşenko administrasiyasının "SB. Belarus Today" qəzeti 2021-ci ilin yayında yazıb ki, Dornau guya Almaniyada soğan yetişdirilməsi sahəsində ən böyük mütəxəssisdir və bu əcnəbinin Belarusda soğan əkmək üçün böyük planları var. Xüsusilə, o, məhsulların saxlanması və emalı üçün tam logistika kompleksi yaratmağı planlaşdırıb və yeni iş yerlərinin açılmasına söz verib.

"Yorqun özü üçün dil biliyi və lazımi əlaqələri olmadan Belarusda iş aparmaq olduqca çətin olardı. Onun ortağı, iş adamı Yuri Kunitskidir, Almaniyada yaşayır. Alman mətbuatının materiallarında o, belə xarakterizə olunur. Uzun illər Rusiya və Belarus təbliğat aparatında işləyib və onun haqqında anketlərdə deyilir: "İşgüzar əlaqələr tövsiyə edilmir", deyə Reform.news yazır.

Jurnalistlərin fikrincə, mənfi işgüzar reputasiya Kunitskinin Dornau ilə ortaq biznesə girməsinə və "Cybulka-Bel"in 50%-nin sahibi olmasına mane olmayıb.

"Dornau "Cybulka-Bel"in kadr məsələsini həll etmək üçün özünəməxsus yanaşmaya malikdir. O, belaruslu siyasi məhbusların işinin keyfiyyətini şəxsən yoxlayıb. Alman siyasətçi belarusların qəsdən işgəncələrə məruz qaldığı bir qurumla "xidmətlərin göstərilməsi" barədə sənədi bilərəkdən imzalayıb", deyə qeyd edilib.

Nəşr xatırladır ki, kameralarda siyasi məhbuslar üçün xüsusi şərait yaradılır: onlardan döşəklər, yastıqlar, yataq dəstləri alınır. Çarpayılarda oturub uzana bilməzsiniz. Saxlanılanlardan bütün cihazlar müsadirə olunur. Kameranın işığı sutkanın 24 saatı yanır və insanlar gecələr bir neçə dəfə qəsdən oyandırılır. hüxrələrin əksəriyyətində tualet və ya hamam yoxdur - hər səhər dəhlizdəki ümumi tualetə aparılmalı olan küncdə yalnız plastik bir vedrə var. Andrey ordakı şəariti işgəncə adlandırıb

Saksoniya parlamentinin Dornunun siyasi məhbusların əməyindən istifadə etdiyindən xəbərdar olub-olmadığı aydın deyil. Ola bilsin ki, biznesin gizlədilməsi işi araşdırılan zaman Almaniyanın bundan xəbəri olmayıb.

Aydın