Almaniya Rusiyanın dövlət enerji nəhəngi "Rosneft”in yerli törəmə şirkətləri üzərində etimad idarəçiliyini üçüncü dəfə, 10 sentyabr 2024-cü ilə qədər uzadacaq.
Bu barədə Qaynarinfo "Bloomberg”ə istinadən xəbər verir ki, bu addım biznesin milliləşdirilməsinin qarşısını alacaq və müəssisənin Moskva tərəfindən satışı üçün zəmin hazırlamağa kömək
edəcək.
Alman hökuməti bu tədbir barədə Rusiya şirkətinin müddətin uzadılması müddətində aktivləri satmağa razı olmasından sonra qərar verib.
Almaniya 2022-ci ilin sentyabrında Rusiyanın Ukraynaya müdaxiləsindən sonra tədarükçülər və tərəfdaşlar işgüzar əlaqələri dayandırmaqla hədələdiyi üçün "Rosneft”in aktivlərinə nəzarəti ələ keçirib.
Bu yaxınlarda bəzi hökumət rəsmiləri nəzarətin bərpası ilə bağlı hüquqi risklərdən ehtiyatlanıb və fevral ayında mümkün milliləşdirmə ilə bağlı dinləmələrə başlayıblar.
"Bu ideya ölkənin üç partiyalı koalisiyasında Almaniyanın Rusiyadakı aktivlərinə, eləcə də milli büdcəyə təsirləri ilə bağlı narahatlıqları artırıb. Rəsmilər son bir neçə həftə ərzində, o cümlədən Türkiyəyə səfəri zamanı Rusiya şirkətinin rəhbəri İqor Seçinlə birbaşa danışıqlar aparıblar”, - Bloomberg yazır.
Danışıqlar ərəfəsində "Rosneft” Almaniyaya qarşı məhkəmə prosesini dayandırıb.
Almaniya İqtisadiyyat Nazirliyi bildirib ki, "Satış qanuni cəhətdən ən təhlükəsiz variantdır və buna görə də neft emalı zavodlarına investisiya qoyuluşunu təmin etmək üçün ən sürətli yoldur”.
Bundan əvvəl xəbər verilmişdi ki, Almaniya hökuməti Rusiyanın "Rosneft” şirkətinin müəssisələrinin, xüsusən də Şvedt şəhərində dördüncü ən böyük neft emalı zavodunun milliləşdirilməsi imkanlarını nəzərdən keçirir.
Nizami Bağırov
