Britaniya astronomları tarixdə ən böyük kosmik partlayışı qeydə alıblar. Bu partlayış hər hansı fövqəlnovanın başlanmasından on dəfə daha parlaqdır.
Qaynarinfo BBC-yə istinadən xəbər verir ki, partlayış 8 milyard işıq ili məsafədə baş verib. Alimlərin fikrincə, o, nəhəng qaz buludunun fövqəlkütləvi qara dəlik tərəfindən udulmasının
nəticəsidir.
Parlaqlıq 2020-ci ildə Kaliforniyadakı kosmik tədqiqat stansiyasının cihazları tərəfindən avtomatik olaraq qeydə alınıb, lakin cəmi bir ildən sonra astronomlar məlumatlarla maraqlanıb və onları təhlil etməyə başlayıblar.
Britaniyanın Sautqempton Universitetinin tədqiqat qrupunun rəhbəri Filip Uizmanın sözlərinə görə, kəşfin miqyası alimlərin partlayışa qədər olan məsafəni müəyyən edə bildikdən sonra üzə çıxıb. Onların fikrincə, bu, təkcə ən güclü partlayış deyil, həm də ən uzun partlayışdır. Kəşfə AT2021lwx təyinatı verilib.
Alimlər belə qənaətə gəliblər ki, partlayışa səbəb superkütləli qara dəlik tərəfindən udulmuş Günəşin ölçüsündən minlərlə dəfə böyük olan irimiqyaslı qaz buludu olub.
Partlayış kosmosa şok dalğası göndərir və həddindən artıq qızdırılan qaz buludunun qalıqları qara dəliyin ətrafında qalaraq dairəyə bənzəyir.
Ehtimal olunur ki, bütün qalaktikaların mərkəzində qara dəliklər var və alimlərin fikrincə, bu cür partlayışlar bu mərkəzlərin yerdəyişməsinə və nəticədə qalaktikaların konfiqurasiyasının dəyişməsinə səbəb olur.
Aydın
