Qaynarinfo xəbər verir ki, "Travel Off Path"ın yaydığı məlumata görə, analitiklər yaşayış, qidalanma, nəqliyyat və əyləncə xərclərini müqayisə edərək ən sərfəli beş şəhəri müəyyənləşdiriblər.

Qiymətləndirmə zamanı "Booking.com" məlumatlarına əsasən üçulduzlu otellərin qiymətləri, "Numbeo" üzrə pivə, restoran və ictimai nəqliyyat tarifləri, "Tripadvisor"da göstərilən büdcə dostu görməli yerlərin sayı və hava limanından transfer xərcləri nəzərə alınıb. Məlumatlar 2026-cı ilin iyun ayına aiddir.

5-ci yer: Sarayevo, Bosniya və Herseqovina

Bosniya və Herseqovinanın paytaxtı Sarayevo Avstriya, Osmanlı və Balkan memarlığının bir araya gəldiyi şəhərlərdən biridir. XV əsrə aid Başçarşı bazarı, Habsburq dövrünün binaları və Birinci Dünya müharibəsinin başlanmasına səbəb olan Frans Ferdinandın qətlə yetirildiyi Latın körpüsü şəhərin əsas görməli yerləri sırasındadır.

Qiymətlər:

* 3 ulduzlu otel – təxminən 65 dollar;

* pivə – 3 dollar;

* büdcə restoranında nahar – 9 dollar;

* ictimai nəqliyyat – 1,3 dollar;

* hava limanından transfer – 40 dollar.

Şəhərdə 106 büdcə dostu turistik məkan mövcuddur.

4-cü yer: Belqrad, Serbiya

Belqrad Balkanların ən dinamik paytaxtlarından biri hesab olunur. Knyaz Mixail küçəsi, Skadarlija məhəlləsi, Kalemeqdan qalası və yaradıcı mərkəzə çevrilmiş Savamala rayonu turistlərin ən çox ziyarət etdiyi məkanlardandır.

Qiymətlər:

* 3 ulduzlu otel – 66 dollar;

* pivə – 3,5 dollar;

* nahar – 12 dollar;

* ictimai nəqliyyat – bütün sərnişinlər üçün pulsuz;

* hava limanından transfer – 42 dollar.

Şəhərdə 140 büdcə dostu turistik obyekt var.

Qeyd olunur ki, Serbiya Avropa İttifaqına və Şengen zonasına daxil deyil.

3-cü yer: Skopye, Şimali Makedoniya

Şimali Makedoniyanın paytaxtı Skopye şəhər mərkəzində yerləşən yüzdən çox heykəli ilə seçilir. Debar Maalo restoran və kafeləri, Karpoş isə tələbə həyatı ilə tanınır. Şəhərdən təxminən 16 kilometr məsafədə yerləşən Matka kanyonu isə kayak və mağara turları üçün məşhur istiqamətdir.

Qiymətlər:

* 3 ulduzlu otel – 56 dollar;

* pivə – 2,8 dollar;

* nahar – 7,5 dollar;

* ictimai nəqliyyat – 0,75 dollar;

* hava limanından transfer – 36 dollar.

Şəhərdə 54 büdcə dostu turistik məkan var.

2-ci yer: Antalya, Türkiyə

Antalya Aralıq dənizinin ən məşhur kurort şəhərlərindən biri hesab olunur. Kaleiçi tarixi məhəlləsi, Adrian qapısı, Konyaaltı və Lara çimərlikləri turistlərin ən çox üz tutduğu yerlər sırasındadır.

Qiymətlər:

* 3 ulduzlu otel – 67,5 dollar;

* pivə – 3 dollar;

* nahar – 10 dollar;

* ictimai nəqliyyat – 0,77 dollar;

* hava limanından transfer – 11,5 dollar.

Şəhərdə 101 büdcə dostu turistik obyekt mövcuddur.

Məqalədə turistlərə xüsusilə cibgirlik və müxtəlif dələduzluq halları ilə bağlı diqqətli olmaları tövsiyə olunur.

1-ci yer: Praqa, Çexiya

Reytinqin lideri Çexiyanın paytaxtı Praqa olub. Burada otellərin qiyməti siyahıdakı digər şəhərlərlə müqayisədə daha yüksək olsa da, çoxsaylı əlçatan turistik məkanlar şəhəri birinci yerə çıxarıb.

Staré Město tarixi mərkəzi, astronomik saat, Náplavka sahili və Letna parkı Praqanın ən məşhur istiqamətləri hesab olunur.

Qiymətlər:

* 3 ulduzlu otel – 117 dollar;

* pivə – 3,12 dollar;

* nahar – 11,5 dollar;

* ictimai nəqliyyat – 1,8 dollar;

* hava limanından transfer – 30,4 dollar.

Şəhərdə 619 büdcə dostu turistik məkan qeydə alınıb ki, bu da reytinq üzrə ən yüksək göstəricidir.

Şengen zonasına səfər edən turistlər üçün

Xatırladılır ki, 2026-cı ilin aprelindən etibarən Şengen zonasının hava limanlarında Entry/Exit System (EES) sistemi tam tətbiq olunur. Bu sistem ilk sərhəd keçidi zamanı səyahətçilərin biometrik məlumatlarının – üz şəkli və barmaq izlərinin – qeydiyyatını tələb edir.

Yeni qaydalar bir sıra hava limanlarında pasport nəzarəti zamanı növbələrin uzanmasına səbəb olub. Hazırda Aİ ölkələrinə həddindən artıq sıxlıq yarandıqda EES yoxlamalarını müvəqqəti dayandırmağa icazə verilsə də, Avropa Sərhəd və Sahil Mühafizəsi Agentliyinin ("Frontex") məlumatına görə, bu güzəşt 6 sentyabrdan etibarən qüvvədən düşəcək.

Aydın