Bir çox turist üçün Avropanın əsas görməli yerləri tarixi məbədlər, qədim amfiteatrlar, eləcə də bütöv bir sivilizasiya yaradan imperatorlar və sərkərdələrlə bağlı məkanlardır. Lakin heç də hamı bilmir ki, bunun üçün turistlərlə dolu Roma və Afinaya getmək vacib deyil.

Qaynarinfo xəbər verir ki, “Travel off Path” nəşri tarix həvəskarlarının qəlbini fəth edə biləcək, lakin turist izdihamının olmadığı dörd Avropa şəhərinin adını açıqlayıb.

Nim, Fransa

Nim Roma imperiyasına maraq göstərən hər bir insanın xəyalını gerçəkləşdirən şəhərdir. Burada təxminən 2000 illik arena yerləşir. I əsrin sonlarında, Romanın əsas abidəsi Kolizeyin istifadəyə verilməsindən cəmi bir neçə onillik sonra inşa edilmiş bu tikili Kolizeyin heyrətamiz dərəcədə yaxşı qorunmuş versiyasını xatırladır.

Lakin Kolizeydən fərqli olaraq, arenanın mərkəzi hissəsi hələ də istifadəyə yararlıdır və hər yay burada dünya şöhrətli sənətçilər çıxış edirlər.

İnanılmaz dərəcədə yaxşı qorunmuş arenadan əlavə, Nimdə I əsrin əvvəllərinə aid “Maison Carrée” məbədi də yerləşir. Bu məbəd demək olar ki, heç bir zərər görmədən günümüzə çatıb. Qədim Roma məbədlərinin qorunma səviyyəsinə görə “Maison Carrée” tamamilə Panteonla rəqabət apara bilər.

Bundan başqa, şəhərdən çox da uzaqda, Pont-du-Gard yaxınlığında Roma imperiyası dövründə Qardon çayı üzərindən inşa edilmiş nəhəng üçmərtəbəli akveduk yerləşir. Onun ətəyində gözəl çınqıllı çimərlik var.

Evora, Portuqaliya

Evora Alenteju regionunun tam mərkəzində yerləşən orta ölçülü, kompakt şəhərdir. Lissabondan buraya qatarla cəmi 1,5 saata çatmaq mümkündür.

Şəhərin əsas görməli yeri təxminən 2000 illik Roma məbədidir. Bu, Portuqaliyada ən yaxşı qorunmuş qədim Roma abidələrindən biridir. Məbəd bəzən Diana məbədi adlandırılır.

Qeyd etmək lazımdır ki, arxeoloqlar məbədi imperator kultu, ehtimal ki, imperator Avqustla əlaqələndirirlər və onun nə vaxtsa Dianaya həsr edildiyini təsdiqləyən heç bir sübut yoxdur.

Hər halda, onun monumental qranit postamenti və yivli korinf sütunlarının hələ də canlı, orta əsrlərdən qalma şəhərin mərkəzində ucalması abidəni daha da möhtəşəm göstərir.

Məbəddən cəmi iki dəqiqəlik piyada məsafədə kilsə yerləşir. Çəhrayı qranitdən inşa edilmiş bu möhtəşəm roman-qotika üslublu tikilidə təntənəli qotika monastır həyəti, hündür mərkəzi nef və şəhərin terrakota damlarına baxmaq üçün qalxmaq mümkün olan dam terrası var.

Plovdiv, Bolqarıstan

Bolqarıstanın ikinci böyük şəhəri nəhəng açıq səma altında muzeyi xatırladır. Burada yunan-Roma xarabalıqlarını, Bizans kilsələrini, Osmanlı məscidlərini və Bolqarıstanın Milli Dirçəlişi dövrünə aid malikanələri görmək mümkündür.

Roma şəhərini xatırladan yeddi təpə üzərində salınmış Plovdiv daha çox yamacda yerləşən qədim teatrı ilə tanınır. Burada bərpa edilmiş mərmər oturacaqlar sıraları və tamaşalarla konsertlər üçün hələ də istifadə olunan yenidən qurulmuş səhnə var.

Digər mühüm abidə əsas küçənin altında gizlənmiş Roma stadionudur. İmperator Adrianın hakimiyyəti dövründə, eramızın II əsrinin əvvəllərində inşa edilib.

Plovdiv Roma xarabalıqlarından tutmuş tarixi mərkəzdə səpələnmiş abidələrə və Nöbet-Təpəyə qədər özünəməxsus, canlı qədim tarix nümunəsidir. Bu görkəmli təpədə xalkolit dövrünə aid yaşayış məskəninin və trakiyalılar, romalılar, bizanslılar və orta əsr hökmdarları tərəfindən inşa və yenidən qurulmuş istehkamların izləri qorunub.

Burada minlərlə il ərzində bir-birinin üzərinə əlavə olunmuş zəngin tarix mövcuddur.

Merida, İspaniya

İspaniyanın qərbində, Madridə nisbətən Portuqaliyaya daha yaxın ərazidə yerləşən Merida az tanınan incilərdən biridir. Şəhərin əsası eramızdan əvvəl 25-ci ildə imperator Avqustun hakimiyyəti dövründə Kantabriya müharibələrində döyüşmüş veteranlar üçün qoyulub.

Burada ən yaxşı qorunmuş Roma teatrlarından biri yerləşir. Əsas səhnənin arxasında korinf sütunlarının ikiqat sırası ucalır, geniş daş oturacaqlar isə hər il festivallar zamanı yenidən tamaşaçılarla dolur.

Bundan başqa, turistlər Qvadalkivir çayı üzərindən keçən və birbaşa Əl-Kasabanın ətəyinə aparan Puente Romano qranit körpüsünü də görə bilərlər. Təxminən 800 metr uzunluğunda olan körpü 835-ci ildə Əməvilər tərəfindən inşa edilmiş İslam qalasına aparır. Qalanın tikintisi zamanı Roma divarının bəzi hissələrindən, eləcə də yenidən işlənmiş Roma-Viziqot hörgüsündən istifadə olunub.

Aydın