Ağ ayılar və pinqvinlər çox vaxt vahid böyük buz dünyasının simvolları kimi qəbul edilir. Lakin əslində bu heyvanlar planetin əks qütblərində yaşayır: ağ ayılar Şimal Buzlu okeanının sahillərində, pinqvinlər isə Antarktidada məskunlaşıb.
Qaynarinfo xəbər verir ki, Arktikada dəniz buzlarının sahəsinin azalması fonunda ağ ayıları xilas etmək üçün onları Antarktidaya köçürmək fikri yarana bilər. Lakin “Discover Wildlife” nəşrinin yazdığına görə, belə bir addım fəlakətlə nəticələnə bilər.
Ağ ayı (Ursus maritimus) hesab edildiyindən daha çoxşaxəli qidalanan heyvandır. Onun əsas ov obyektləri halqalı suitilər olaraq qalır. Bununla yanaşı, yırtıcı marallara hücum edə, quşları və onların yumurtalarını ovlaya, midyə və xərçənglərlə qidalana bilər. Bundan əlavə, ayılar yosunlarla qidalanmaq üçün dənizin dibinə qədər də baş vura bilirlər.
İlk baxışdan Antarktidadakı şərait həqiqətən də bu növ üçün əlverişli görünə bilər. Burada dəniz buzları var, sahil sularında isə müxtəlif suiti növləri, o cümlədən Ross suitisi, Ueddell suitisi, krab yeyən suiti, dəniz bəbəyi və dəniz fili yaşayır.
Müəllif həmçinin böyük pinqvin koloniyalarına diqqət çəkir. Onlar ağ ayılar üçün asan ov mənbəyinə çevrilə bilərdi.
“Ağ ayının davranışı müəyyən qədər dəyişmiş şəraitə uyğunlaşa biləcək qədər çevikdir. Lakin bunun Antarktida faunasına nəticələri fəlakətli olardı”, deyə nəşr qeyd edir.
Məhz yırtıcının uyğunlaşma qabiliyyəti onun Antarktidada peyda olmasını xüsusilə təhlükəli edərdi. Yerli heyvanlar təbii quru yırtıcılarının olmadığı şəraitdə təkamül keçirib və belə təhlükədən qaçmaq üçün formalaşmış davranışlara malik deyillər.
Məqalənin müəllifinin izahına görə, ağ ayı mövcud qida ehtiyatlarından səmərəli istifadə edə bilən son dərəcə güclü yırtıcıdır. Buna görə də onun Antarktidada peyda olması regionun ekosistemlərindəki tarazlığı kəskin şəkildə dəyişə bilərdi.
Quru yırtıcıları ilə mübarizə təcrübəsi olmayan heyvanlar yeni və ciddi təhlükə ilə üz-üzə qalardılar.
Aydın
Şərhlər