Kiprik qaynağı və laminasiya uzun illərdir qadınlar arasında ən populyar kosmetik prosedurlardan hesab olunur. Bir çox qadın tuşdan istifadə etmək əvəzinə bu üsullara üstünlük verir. Kiprik qaynağı baxışlara daha açıq və ifadəli görünüş qazandırır, eyni zamanda gün ərzində makiyajsız, baxımlı görünməyə imkan verir.

Qaynarinfo-nun məlumatına görə, Avropa Retina Cəmiyyətinin (EURETINA) üzvü, oftalmoloq, retinoloq və lazer oftalmocərrahı Olqa Venediktova UNIAN-a açıqlamasında kiprik qaynağı və laminasiyanın kimlər üçün uyğun olduğunu, bu prosedurların uzunmüddətli tətbiqinin mümkünlüyünü və onların təbii kipriklərə təsirini izah edib.

Kiprik qaynağı zərərlidirmi?

Mütəxəssisin sözlərinə görə, prosedur peşəkar şəkildə, sertifikatlı materiallardan istifadə edilməklə və gigiyena qaydalarına tam əməl olunaraq həyata keçirildikdə, kiprik qaynağı özlüyündə zərərli hesab edilmir. Bunun üçün ustanın xüsusi böyüdücü işıqdan istifadə etməsi, həmçinin pasiyentdə xroniki göz xəstəliklərinin və ya istifadə olunan materiallara qarşı fərdi həssaslığın olmaması vacibdir.

Bununla belə, bəzi hallarda kiprik qaynağından imtina etmək tövsiyə olunur. Bunlara göz əməliyyatına hazırlıq dövrü, gözdaxili inyeksiya müalicəsi, istifadə olunan materiallara allergiya, həmçinin blefarit, konyunktivit və arpacıq kimi kəskin iltihabi xəstəliklər daxildir.

Həkim bildirib ki, blefarokonyunktivit, quru göz sindromu, xalazion, tez-tez arpacıq yaranması və allergiyaya meyillilik kimi xroniki problemləri olan insanlarda hətta düzgün icra edilmiş kiprik qaynağı belə qızartı, yanma və narahatlıq yarada bilər. Belə hallarda dərhal oftalmoloqa müraciət edilməlidir.

Bundan əlavə, keyfiyyətsiz yapışdırıcılardan istifadə edilməsi və ya prosedur texnologiyasına əməl olunmaması göz sağlamlığı üçün ciddi risk yarada bilər.

Kipriklərin düzgün seçilməsi vacibdir

Olqa Venediktovanın sözlərinə görə, süni kipriklərin uzunluğu və çəkisi təbii kipriklərə uyğun olmalıdır. Həddindən artıq ağır kipriklər təbii kipriklərə əlavə yük yaradaraq onların qırılmasına və tökülməsinə səbəb ola bilər. Eyni zamanda, ustanın təbii kiprikləri bir-birinə yapışdırmaması və yapışdırıcını yalnız lazımi nöqtələrə tətbiq etməsi vacibdir.

Prosedur düzgün yerinə yetirilsə belə, göz yaşarması, qızartı və ya yanma hissi yaranarsa, həkimə müraciət etmək lazımdır. Bu, həm yapışdırıcının tərkibinə qarşı allergik reaksiya, həm də onun buynuz qişaya və ya konyunktivaya düşməsi ilə bağlı ola bilər.

Mütəxəssis bildirib ki, praktikada kiprik qaynağından sonra kimyəvi göz yanıqları da qeydə alınıb. Xüsusilə yeniyetmələrin ev şəraitində ucuz materiallardan istifadə edərək özlərinə kiprik yapışdırması ciddi təhlükə yaradır. Bu, allergiya, xroniki iltihab və hətta göz yanıqları ilə nəticələnə bilər.

Kiprik qaynaqları arasında fasilə olmalıdırmı?

Olqa Venediktovanın sözlərinə görə, əgər heç bir problem yaranmırsa, kiprik qaynaqları arasında mütləq fasilə vermək tələb olunmur. Lakin təbii kipriklərin vəziyyəti mütəmadi olaraq qiymətləndirilməlidir. Əgər kipriklər nazikləşir, qırılır və ya seyrəkləşirsə, bu, həm xarici təsirlərin, həm də vitamin çatışmazlığı kimi daxili səbəblərin göstəricisi ola bilər. Belə hallarda prosedura ara vermək və ya daha təbii görünüşə üstünlük vermək məqsədəuyğun hesab olunur.

LED kiprik qaynağı, yoxsa klassik üsul?

Həkim qeyd edib ki, LED kiprik qaynağını klassik üsuldan daha təhlükəsiz və ya daha təhlükəli hesab etmək düzgün deyil. LED texnologiyasının əsas üstünlüyü yapışdırıcının daha sürətlə bərkiməsidir.

Bununla belə, prosedur zamanı gözlər tam bağlı olmazsa, LED lampasının işığı gözə düşərək buynuz qişa və konyunktivanın zədələnməsinə səbəb ola bilər.

Kiprik laminasiyasının riskləri

Olqa Venediktovanın fikrincə, laminasiya ən təhlükəsiz prosedurlardan biridir. Çünki bu zaman nə süni kiprikdən, nə də yapışdırıcıdan istifadə olunur. Bununla belə, istifadə olunan maddələrə qarşı fərdi allergik reaksiya yarana bilər.

Mütəxəssis bildirib ki, aşağıdakı hallarda laminasiya tövsiyə edilmir:

* Gözdə kəskin iltihab və ya narahatlıq olduqda;

* Blefarokonyunktivit, quru göz sindromu, xalazion, arpacığa meyillilik və ya allergiya kimi xroniki problemlər mövcud olduqda;

* Göz və ya göz qapağı əməliyyatı planlaşdırıldıqda. Belə hallarda prosedurdan ən azı bir ay əvvəl imtina edilməlidir.

Olqa Venediktova xüsusilə vurğulayıb ki, laminasiya oftalmoloji əməliyyatlarla qətiyyən uyğun gəlmir. Onun sözlərinə görə, əməliyyat zamanı qanaxmanı dayandırmaq üçün istifadə olunan elektrokoaqulyatorun təsiri altında laminasiya olunmuş kipriklər alovlana bilər. Bu isə ciddi fəsadlara səbəb ola biləcək təhlükəli vəziyyət hesab olunur.

Aydın