Yeni araşdırma itlər üçün ən uyğun gündəlik gəzintinin orta hesabla 67 dəqiqə davam etməli olduğunu göstərib. Tədqiqat həmçinin ideal gəzinti zamanı itin ətrafı iyləməsi üçün təxminən 16 fərqli dayanacaq nöqtəsinin olmasının vacibliyini ortaya qoyub.

Qaynarinfo xəbər verir ki, araşdırmada 1800 it sahibinin iştirakı ilə sorğu keçirilib. İştirakçılardan itlərinin ən çox hansı növ gündəlik gəzintidən zövq aldıqları barədə fikir bildirmələri istənilib.

Nəticələrə görə, itlər ən çox açıq ərazilərdə, meşələrdə və parklarda edilən gəzintiləri sevirlər. Belə məkanlar onların sərbəst qaçmasına və ətraf mühiti araşdırmasına imkan yaradır.

Sorğu iştirakçıları hesab edirlər ki, ideal gəzinti zamanı it ən azı 16 fərqli yerdə dayanaraq ətrafı iyləməlidir. Bundan əlavə, ot və ya palçıq üzərində diyirlənmək, ağac budaqları taparaq onlarla oynamaq da gəzintinin vacib hissələrindən sayılır.

Araşdırmaya əsasən, gəzinti zamanı itin ən azı üç mehriban başqa itlə qarşılaşması və təhlükəsiz şəraitdə suya girərək sərinləməsi də ideal ssenarinin tərkib hissəsidir.

Sorğuda iştirak edənlərin 38 faizi bildirib ki, gəzinti zamanı öz rahatlıqlarından əvvəl itlərinin xoşbəxt olmasına üstünlük verirlər.

Bununla yanaşı, respondentlərin təxminən 80 faizi hər gün eyni marşrutdan istifadə etdiklərinə görə özlərini narahat hiss etdiklərini etiraf edib.

Araşdırmanı sifariş edən "Animal Friends Pet Insurance" şirkətinin baytarlıq xidmətləri üzrə rəhbəri Cen Hipvell bildirib ki, hər itin ehtiyacları fərqlidir. Onun sözlərinə görə, ideal gəzinti müddəti və forması itin yaşı, cinsi, sağlamlıq vəziyyəti və xarakterindən asılı olaraq dəyişir.

Araşdırma göstərib ki, it sahibləri gəzinti marşrutu seçərkən ilk növbədə təhlükəsizliyə diqqət yetirirlər. Sakit ərazilər və geniş açıq məkanlar daha çox üstünlük verilən seçimlər sırasındadır.

İştirakçılar həmçinin hava şəraitini, torpağın temperaturunu, digər itlər və ya kənd təsərrüfatı heyvanları ilə qarşılaşma ehtimalını da əvvəlcədən nəzərə aldıqlarını bildiriblər.

Bununla belə, respondentlərin yarıdan çoxu dik yamaclar və ya sahil zonaları kimi potensial təhlükəli əraziləri müəyyən etməkdə çətinlik çəkdiklərini etiraf edib.

Mütəxəssislər gəzintidən əvvəl marşrutun və hava proqnozunun yoxlanılmasını tövsiyə edirlər. Xüsusilə isti havalarda it üçün kifayət qədər su, mükafat yeməyi, qayış, oyuncaq və dincələ biləcəyi yerin təmin edilməsi vacib hesab olunur.

Araşdırmadan sonra ekspertlər it sahibləri üçün təhlükəsiz gəzinti marşrutları ilə bağlı xüsusi tövsiyələr də hazırlayıblar.

Davranış üzrə mütəxəssislər bildirirlər ki, itlər gün ərzində bir neçə dəfə gəzintiyə çıxarılmalıdır. Ümumi tövsiyəyə görə, gündə ən azı üç qısa və iki uzun gəzinti məqsədəuyğun sayılır.

Onların sözlərinə görə, qısa gəzintilər itin təbii ehtiyaclarını ödəməsi və gündəlik hərəkəti üçün kifayət edir. Uzun gəzintilər isə fiziki fəaliyyət, enerji sərfiyyatı və psixoloji rahatlıq baxımından daha böyük əhəmiyyət daşıyır.

Bununla yanaşı, ekspertlər vurğulayırlar ki, bütün itlər üçün vahid gəzinti proqramı mövcud deyil. Ən uyğun müddət və tezlik hər bir itin cinsi, yaşı, fiziki aktivlik səviyyəsi və gündəlik vərdişləri nəzərə alınmaqla müəyyənləşdirilməlidir.

Aydın