KİV: Polis Soutport uşaq qatili ilə bağlı xəbərdarlıqlara məhəl qoymayıb

Qaynarinfo xəbər verir ki, media Daxili İşlər Nazirliyinin hazırladığı hesabata, habelə nazir İvet Kuperin və digər mənbələrin açıqlamalarına istinad edir.

 

Onların məlumatlarına görə, xüsusilə, Rudakubana üç dəfə terror hücumlarının qarşısının alınması ilə məşğul olan Prevent bölməsinin diqqətini çəkib. Bu, onun məktəb atışmalarına, terrora, İrlandiya Respublika Ordusuna, Yaxın Şərqə və kəşfiyyat xidmətlərinin işinə böyük marağı ilə bağlı olub. Bu maraqla bağlı Rudakubananın müəllimləri polisə məlumat veriblər. 

Bununla belə, terrorizmin qarşısının alınması bölməsi belə nəticəyə gəlib ki, Rudakubana sadəcə olaraq 13-14 yaşlı uşaq üçün qeyri-adi olan dünya xəbərlərinə maraq nümayiş etdirir (bu, 2019-21-ci illərdə baş verib), lakin onun radikallaşma riski yoxdur. Həmçinin bildirilir ki, 2019-cu ildə Rudakuban özü ilə bıçaq gətirdiyi üçün məktəbdən qovulub. Başqa bir məktəbdə o, şagirdlərdən birini xokkey çubuğu ilə vuraraq biləyini sındırıb və hadisə yerinə gələn polis Rudakubananın bel çantasında bıçaq tapıb. 2022-ci ildə polis onu avtobusda olarkən yenə bıçaqla yaxalayıb.

17 yaşlı Rudakubana keçən ilin iyulunda Soutportda rəqs dərsində uşaqlara bıçaqla hücum edib. O, üç qızı öldürüb, daha on uşağı yaralayıb. Bu həftə Rudakuban 13 ömürlük həbs cəzasına məhkum edilib.