Kolumbiyadakı narkokartellərin Ukraynada pilotsuz uçuş aparatlarından istifadə sahəsində əldə olunan təcrübəni mənimsəmək məqsədilə öz adamlarını könüllü kimi Ukrayna müdafiə qüvvələrinə göndərməyə çalışdığı iddia olunur.

Qaynarinfo xəbər verir ki, bu barədə "Financial Times" qəzeti yazıb.

Nəşrin məlumatına görə, son bir il ərzində Kolumbiyadakı cinayətkar qrupların hərbi təcrübə, xüsusilə də pilotsuz uçuş aparatlarının tətbiqi sahəsində bilik əldə etmək üçün şəxsləri Ukraynaya göndərməsi ilə bağlı bir neçə məlumat yayılıb. İddiaya əsasən, həmin şəxslər əldə etdikləri bacarıqları sonradan Kolumbiyaya qayıtdıqdan sonra ölkənin təhlükəsizlik qüvvələrinə qarşı istifadə edə bilərlər.

Ukraynada fəaliyyət göstərən humanitar təşkilatın kolumbiyalı əməkdaşı bildirib: "İşə cəlbetmə sxemləri çox mürəkkəbdir. Məni ən çox narahat edən isə onların qazandıqları ixtisaslaşma səviyyəsidir. Keçmiş paramilitar qüvvə üzvləri, keçmiş partizanlar və sabiq hərbçilər burada birlikdə döyüşür və birlikdə pilotsuz uçuş aparatlarını idarə etməyi öyrənirlər".

"Financial Times" qeyd edir ki, pilotsuz uçuş aparatları Kolumbiyada hökumətlə üsyançılar və narkotik qaçaqmalçıları arasında uzun illərdir davam edən silahlı qarşıdurmanın xarakterini dəyişib. Əvvəllər hökumət cəngəllik ərazilərində hava üstünlüyünə arxalana bilirdisə, hazırda vəziyyət fərqlidir.

Məlumata görə, ötən il Kolumbiya ordusu pilotsuz uçuş aparatları ilə həyata keçirilən hücum cəhdlərinin 96 faizinin qarşısını radioelektron mübarizə vasitələri və ya aparatların məhv edilməsi yolu ilə alıb. Bununla belə, qanunsuz silahlı qrupların Ukraynada tətbiq olunan təcrübəni mənimsəyərək bu müdafiə vasitələrini aşmağa çalışdığı bildirilir.

Hazırda Ukraynada olan kolumbiyalı pilotsuz uçuş aparatı operatorlarından biri qəzetə deyib ki, narkokartellərin nümayəndələri FPV (birinci şəxs görüntüsü) zərbə dronlarının sazlanması və idarə olunması üzrə təlim almaq imkanları axtarırlar.

Onun sözlərinə görə, Kolumbiyada artıq FPV dronlarından istifadə olunmağa başlansa da, dronla operator arasında rabitənin şifrələnməsi və partlayıcı qurğuların Ukraynada tətbiq edilən üsullarla quraşdırılması sahəsində kifayət qədər təcrübə yoxdur.

Nəşr yazır ki, qanunsuz silahlı qruplar həmçinin ordunun radio siqnallarını boğmaq imkanlarından yayınmaq üçün uzun məsafələrdə yerüstü idarəetmə sistemləri ilə nazik optik lif kabeli vasitəsilə əlaqə saxlayan dronlar əldə etməyə çalışırlar.

Analitiklərin fikrincə, əsas vəzifələrdən biri Ukraynadan qayıdan kolumbiyalı döyüşçülər vasitəsilə bu biliklərin cinayətkar qruplara ötürülməsinin qarşısını almaqdır.

Ukrayna Müdafiə Nazirliyinin xarici mütəxəssislərin cəlbi mərkəzinin əməkdaşı Taras Palyanitsa bildirib ki, kolumbiyalılar sürətlə öyrənir, mürəkkəb xidmət şəraitinə asan uyğunlaşır və peşəkarlıqları ilə komandirlərin etimadını qazanırlar.

Bundan əvvəl Kolumbiya Prezidenti Qustavo Petro Ukraynada döyüşən kolumbiyalıların vəziyyətini tənqid edərək onları ölkəyə qayıtmağa çağırmışdı. Onun hökuməti xarici silahlı qüvvələrə qoşulma hallarını azaltmaq məqsədilə hərbi qulluqçuların maaşlarını artırıb və BMT-nin muzdlularla bağlı 1989-cu il Konvensiyasını ratifikasiya edib.

Aydın