Böyük Britaniyada Kral III Çarlzın vəfat edəcəyi təqdirdə qüvvəyə minəcək "Menay körpüsü" (Operation Menai Bridge) adlı məxfi plan mövcuddur. Plan hökumətin və Birlik ölkələrinin məlumatlandırılmasını, milli matəmi, dəfn mərasimini və Şahzadə Uilyamın dərhal taxta çıxmasını nəzərdə tutur.

Qaynarinfo xəbər verir ki, bu barədə "Business Insider Polska" məlumat yayıb.

"Menay körpüsü" niyə belə adlanır?

"Menay körpüsü" əməliyyatı Uelsdə yerləşən və 1826-cı ildə tikilmiş asma körpünün adını daşıyır. Bu adın seçilməsi III Çarlzın uzun illər Uels şahzadəsi titulunu daşıması ilə əlaqələndirilir.

III Çarlz 2022-ci ildə Kraliça II Elizabetin vəfatından sonra, 73 yaşında taxta çıxaraq Britaniya tarixində hakimiyyətə gələn ən yaşlı monarx olub. Onun vəfatı ilə bağlı prosedurların hazırlanmasına isə hələ 2023-cü ildə keçirilən tacqoyma mərasimindən əvvəl başlanılıb.

İlk saatlarda nə baş verəcək?

Monarxın vəfatından dərhal sonra Bukinqem sarayı baş nazir və Nazirlər Kabinetinin üzvləri də daxil olmaqla əsas dövlət rəsmilərini məlumatlandıracaq.

Daha sonra Böyük Britaniyanın Xarici İşlər Nazirliyi III Çarlzın dövlət başçısı olduğu ölkələrin hökumətlərinə, eləcə də Millətlər Birliyinə üzv dövlətlərə rəsmi bildiriş göndərəcək.

Ardınca kral ailəsi ictimaiyyət üçün rəsmi bəyanat yayacaq. Elan Bukinqem sarayının darvazasında yerləşdiriləcək və kütləvi informasiya vasitələrinə təqdim olunacaq.

Planın bütün detalları məxfi saxlanılsa da, prosesin Kraliça II Elizabetin vəfatından sonra tətbiq olunan prosedurlara bənzəyəcəyi gözlənilir.

Milli matəm elan olunacaq

Kralın vəfatından sonra Bukinqem sarayı, Vindzor qəsri və Uaytholl kimi mühüm dövlət binalarında bayraqlar yarıya endiriləcək.

Bundan əlavə, Böyük Britaniya parlamenti, eləcə də Şotlandiya, Uels və Şimali İrlandiyanın qanunverici orqanlarının fəaliyyəti dayandırılacaq.

Bir çox müəssisə matəm müddətində işini müvəqqəti dayandıracaq. Bukinqem sarayının kral ailəsinə başsağlığı vermək istəyən insanların əsas toplaşma məkanına çevriləcəyi gözlənilir.

III Çarlzın tabutu ictimaiyyətin vida edə bilməsi üçün Vestminster zalında yerləşdiriləcək.

Dəfn mərasimi 10 gün sonra keçiriləcək

Məlumata görə, kralın dəfn mərasiminin vəfatından təxminən 10 gün sonra keçirilməsi planlaşdırılır.

Kraliça II Elizabet və Şahzadə Diananın dəfn mərasimləri kimi, III Çarlzın vida mərasiminin də Vestminster abbatlığında təşkil ediləcəyi ehtimal olunur.

Mərasimdən sonra tabut Londondan Vindzor qəsrinə aparılacaq və kral burada dəfn olunacaq.

Taxt-tac varisliyi

III Çarlzın vəfatından sonra oğlu Şahzadə Uilyam avtomatik olaraq kral olacaq.

Onun ilk rəsmi çıxışlarından biri xalqa müraciət etmək olacaq. Uilyam müraciətində atasının vəfatı ilə bağlı başsağlığı verəcək və yeni monarx kimi vəzifələrini üzərinə götürdüyünü elan edəcək.

Taxta çıxma Şurasının 24 saat ərzində toplanaraq Uilyamın kral olduğunu rəsmən təsdiqləməsi gözlənilir.

Tacqoyma mərasimi isə ənənəyə uyğun olaraq bir neçə ay sonra Vestminster abbatlığında keçiriləcək.

Şahzadə Uilyamın həyat yoldaşı Keyt "kraliça-konsort" titulunu daşıyacaq. Əgər Kraliça Kamilla III Çarlzdan uzun ömürlü olarsa, o, "kraliça-dul" titulunu alacaq.

Uilyam və Keytin böyük oğlu Şahzadə Corc taxtın növbəti varisi olacaq. O, avtomatik olaraq Kornuoll və Rotsey hersoqu titullarını alacaq, daha sonra isə ənənəyə uyğun şəkildə Uels şahzadəsi elan oluna bilər.

Əsginaslar, pasportlar və poçt qutuları dəyişəcək

İngiltərə Bankı yeni əsginaslar buraxacaq və onların üzərindəki III Çarlzın təsviri mərhələli şəkildə Kral Uilyamın təsviri ilə əvəz olunacaq. Bu proses bir neçə il davam edə bilər.

Eyni zamanda pasportlar və rəsmi möhürlər yenilənəcək.

Uilyamın hakimiyyəti dövründə quraşdırılacaq yeni poçt qutularında onun monoqramı yerləşdiriləcək. Polis və hərbçilərin forma nişanlarında da müvafiq dəyişikliklər ediləcək.

Aydın