Moskvanın Lefortovo Məhkəməsi The Wall Street Journal (WSJ) qəzetinin jurnalisti Evan Gerşkoviçin həbs müddətini martın 30-dək uzadıb.
Qaynarinfo xəbər verir ki, bu barədə Moskva məhkəmələrinin mətbuat xidmətinin Telegram kanalında məlumat
verilib.
Gerşkoviç ötən ilin yazından həbsdədir. FSB-nin məlumatına görə, Gerşkoviç ABŞ-ın maraqları üçün çalışıb və Rusiyanın hərbi potensialı haqqında məlumat toplayıb. Təhlükəsizlik rəsmiləri hesab edir ki, jurnalist məlumatı Dövlət Departamentinə ötürmək üçün Uralda Rusiya hərbi-sənaye kompleksinin necə işlədiyini öyrənməyə çalışıb. Jurnalist hazırda Lefortovo istintaq təcridxanasındadır.
WSJ-nin Moskva bürosunun müxbiri Rusiya Federasiyasının Cinayət Məcəlləsinin 276-cı maddəsi (casusluq) ilə ittiham olunur. Bu maddə üzrə maksimum cəza 20 il həbsdir. Gerşkoviç özünü təqsirkar bilmir. Eyni zamanda, WSJ-nin baş ofisi dəfələrlə jurnalistin azad edilməsini və Amerika tərəfinə verilməsini tələb edib. Qəzet müxbirə qarşı irəli sürülən ittihamlarla qəti şəkildə razılaşmır.
Bundan əvvəl ABŞ prezidentinin milli təhlükəsizlik üzrə müşaviri Ceyk Sallivan bildirmişdi ki, Vaşinqton Gerşkoviçlə bağlı vəziyyəti diqqətlə izləyir və mümkün məhbus mübadiləsi üçün Moskva ilə danışıqlar aparır. Kreml də təsdiqləyib ki, ABŞ və Rusiya arasında Gerşkoviçlə bağlı təmaslar üçün kommunikasiya kanalı var, lakin bu danışıqlar açıq olmayacaq.
2023-cü ilin dekabrında ABŞ Dövlət Departamentinin sözçüsü Metyu Miller Evan Gerşkoviç və Pol Uilanın mübadiləsi ilə bağlı problemlər barədə məlumat verib. Millerin sözlərinə görə, Rusiya Amerika tərəfinin təklif etdiyi hər hansı variantdan imtina edir. Dövlət Departamenti mümkün mübadilə senariləri ilə bağlı Vladimir Putinə bir sıra təkliflər etdiklərini, lakin onların hamısının rədd edildiyini vurğulayıb.
Xatırladaq ki, 1986-cı ildən Rusiyada xarici media işçiləri saxlanılmayıb. Gerşkoviç soyuq müharibədən sonra Rusiya istintaq təcridxanasına düşmüş ilk xarici nəşr jurnalisti olub.
Ukraynada hərbi əməliyyatlar başlayandan sonra aparıcı Qərb mediası, o cümlədən BBC, The New York Times və Reuters müxbir məntəqələrini Rusiyadan Aİ ölkələrinə köçürmək qərarına gəlib.
Alpər
