Portuqaliyanın paytaxtı Lissabon 2026-cı ildə Avropanın ən yaxşı şəhər turizmi istiqaməti adına layiq görülüb. Şəhər Roma, Barselona, London və səyahətçilər arasında populyar olan digər şəhərləri geridə qoyub. Bundan əlavə, Lissabon kruiz turizminin inkişafına görə də mükafat qazanıb.
Qaynarinfo xəbər verir ki, bu barədə “Wprost” nəşri yazır.
Qaliblər oktyabrın 17-də Monteneqroda keçirilən “World Travel Awards” mərasimi zamanı elan olunub. Lissabon “Avropanın aparıcı şəhər turizmi istiqaməti – 2026” (“Europe’s Leading City Destination 2026”) mükafatına layiq görülüb. Bu nominasiya üzrə Amsterdam, Berlin, Venesiya, Vyana, Cenevrə, Dubrovnik, Lion və Porto da mübarizə aparıb.
Lissabonun turizm sektorunun nümayəndələri şəhərin uğurunu ziyarətçilərə təqdim etdiyi müxtəlif imkanlarla əlaqələndirirlər. Portuqaliyanın paytaxtı tarixi irsi müasir turizm imkanları ilə birləşdirir. Eyni zamanda, yerli turizm təşkilatları səyahətçiləri şəhərdə daha uzun müddət qalmağa, yalnız mərkəzi deyil, ətraf yaşayış məntəqələrini də kəşf etməyə təşviq edirlər.
Lissabonun uğurları bununla məhdudlaşmayıb. Eyni mərasimdə şəhər kruiz gəmiləri ilə səyahət edən turistlər üçün Avropanın ən yaxşı istiqaməti seçilib. Bu kateqoriyada Lissabon Afina, Kopenhagen, Dubrovnik və Venesiya kimi rəqiblərini geridə qoyub.
Portuqaliya da İspaniya, Yunanıstan və Türkiyəni qabaqlayaraq Avropanın ən yaxşı turizm istiqaməti adına layiq görülüb. Daha bir mükafatı isə Porto şəhəri qazanıb. Porto “World Travel Awards” çərçivəsində mədəniyyət kateqoriyasında qalib olub.
Aydın
