Mançester və ya Venesiya kimi Avropanın bir çox məşhur şəhərləri həmişə turistlərlə doludur, ona görə bu şəhərlərdə özünüzü çox rahat hiss etməyə bilərsiniz. Kiçik bir Balkan ölkəsi olan Şimali Makedoniya isə daha rahat istirahət üçün ideal seçim ola bilər.

Qaynarinfo xəbər verir ki, bu barədə "Mirror"a turizm mütəxəssisi Milo Boyd məlumat verib.

Mütəxəssis bildirib ki, bu günə olan məlumata görə, ölkə ildə ən az ziyarətçi sayı ilə Avropada üçüncü yerdədir. Bununla belə, Şimali Makedoniya çox gözəldir və sərfəli turizm istiqamətinə malikdir.

"Xorvatiya, Monteneqro və Yunanıstan kimi digər daha məşhur turizm mərkəzləri ilə eyni yarımadada yerləşdiyini nəzərə alsaq, digər istirahət yerləri ilə müqayisədə onun nisbi tanıtımının olmaması təəccüblüdür. Xüsusilə də onun çox maraqlı yerləri olduğunu nəzərə alsaq... Burada UNESCO-nun Ümumdünya Mədəni İrsi siyahısına daxil olan yerləri var. O cümlədən 9-cu əsrə və ya daha əvvələ aid ağardılmış Osmanlı evləri və Romanesk kilsələri ilə tanınan cazibədar göl kənarındakı Ohrid şəhəri diqqətə layiqdir", deyə Milo Boyd bildirib.

Material müəllifi vurğulayıb ki, bölgə dörd müasir ölkənin ərazisini əhatə edən, Balkanların bir hissəsinə sahib olan Makedoniyalı İsgəndər tərəfindən idarə olunması ilə tanınır.

"Skopyenin mərkəzində əzəmətli at üzərində əfsanəvi döyüşçünün nəhəng xatirə heykəli ucalır və Şimali Makedoniya xalqının tarixi komandana olan sevgisini vurğulayır", deyə ekspert əlavə edib.

Bu ölkənin orada doğulmuş Tereza Ana ilə əlaqəli olduğu da az məlumdur. O, Hindistanda yoxsulların və xəstələrin qəyyumluğu kimi məşhurlaşıb, lakin etnik alban olub və Şimali Makedoniyada doğularaq böyüyüb.

"Bütün bu məşhur assosiasiyaları nəzərə alsaq, Şimali Makedoniyanın daha çox ziyarət edilən ölkə olmaması bəlkə də təəccüblüdür. Onun Aralıq dənizinin ən məşhur istiqamətlərindən bəziləri ilə həmsərhəd olması, lakin dənizə birbaşa çıxışının olmaması, eləcə də məhdud hava nəqliyyatı mümkün izahat ola bilər", deyə Milo Boyd qeyd edib.

Həmçinin bu yaxınlarda ölkəyə, xüsusən də ecazkar Ohrid şəhərinə səfər edən "Express" nəşrindən redaktor Ester Marşalın təəssüratlarını bölüşüb.

"Köhnə şəhər mənzərəli kilsələrlə dolu füsunkar bir yerdir. Mən cəmi 14 funta şərabla gölün sahilində böyük bir nahardan həzz aldım. Şirin köhnə şəhərdə bir qaşıq dondurma mənə cəmi 90 pensə, qəşəng göl kənarındakı kafedə bir kapuçino isə 1,55 funta başa gəldi", deyə Ester Marşal bildirib.

Bundan əlavə, Ester Marşal Şimali Makedoniyanın paytaxtı Skopyedə olub. Onun sözlərinə görə, bu şəhər ona bir az qəribə görünüb:

"Skopyedə diqqətinizi çəkən ilk şey nəhəng heykəllərin sayıdır. 2014-cü ildə şəhər yenidənqurma layihəsinə başlayıb və 100-dən çox heykəl qoyulub. Döyüşçülərdən tutmuş pirat gəmilərə və şirlərə qədər - demək olar ki, abidəsi olmayan küçə yoxdur. Nəhəng heykəllər hər kəsin zövqünə uyğun olmasa da, onlara baxmağa dəyər. Skopyedə bir neçə gündən çox vaxt keçirməyi tövsiyə etməzdim, ancaq yaxınlıqdakı Matka Kanyonunu araşdırmaq üçün paytaxt mütləq ziyarətə dəyər".

Eyni zamanda Milo Boyd paytaxtda mütləq ziyarət etməyə dəyər yerlərdən danışıb. Onun sözlərinə görə, birinci yerdə Tereza Ananın doğulduğu yerdir:

"Eklektik kilsə 2009-cu ildə Tereza Ananın doğumundan bir gün sonra vəftiz olunduğu köhnə kilsənin yerində tikilib. Bir az tarixlə maraqlanırsınızsa, Makedoniya Mübarizə Muzeyi məhz sizin üçündür. Bu qaranlıq muzey 16-cı əsrdə Makedoniyalı xristianların Osmanlı hökmdarlarına qarşı üsyanından başlayaraq 1991-ci ildə ölkənin Yuqoslaviyadan müstəqilliyini elan etməsi ilə bitən işğal tarixinə və ölkənin müstəqilliyi uğrunda mübarizəyə həsr olunub".

Aydın