Nikah - həyatın ən gözəl, eyni zamanda, ən çətin səyahətlərindən biridir. Bir çox insan evliliyin ən ağır dərslərini yalnız münaqişələr, məyusluqlar və hətta boşanma ilə qarşılaşdıqdan sonra anlayır.
Qaynarinfo xəbər verir ki, mütəxəssis Mark Travers bu mövzuda CNBC üçün hazırladığı məqalədə evlilik həyatına dair insanların çox gec başa düşdüyü 5 əsas həqiqəti açıqlayıb.
1. Təkcə sevgi nikahı qorumaq üçün yetərli deyil
Bir çox cütlük düşünür ki, onlar bir-birini sevdikcə hər şeyi aşacaqlar. Lakin psixoloq bildirir ki, sevgi təkbaşına ünsiyyət fərqlərini, şəxsi dəyərləri və uzunmüddətli hədəfləri həll edə bilmir.
Evliliyi həqiqətən qoruyan sədaqət, səylər və dəyişikliklərə uyğunlaşmaq bacarığıdır. Sevgi münasibətdə istini qoruyub saxlamağa kömək edə bilər, lakin nikahın davamlılığı münaqişələrin necə həll olunmasından, tərəflərin bir-birinə dəstəyindən və fədakarlığından asılıdır.
2. Münaqişələr qaçılmazdır və çox olacaq
Cütlüklər düşünür ki, həqiqətən uyğun insanlar mübahisə etməzlər. Lakin psixoloqun fikrincə, münaqişələr birgə həyatın ayrılmaz hissəsidir və hətta bəzən zəruridir.
Əgər bir münasibətdə heç bir münaqişə yoxdursa, çox güman ki, tərəflər arasında vacib məsələlər sadəcə olaraq müzakirə edilmir.
"Münasibətləri zədələyən mübahisələr deyil, cütlüklərin fikir ayrılıqlarını necə həll etdikləridir. Sağlam münaqişə partnyorları bir-birinə daha da yaxınlaşdıra bilər, çünki bu, qarşılıqlı ehtiyaclar və istəklər barədə səmimi dialoqa qapı açır", deyə Travers vurğulayıb.
3. Həyat yoldaşınız bütün ehtiyaclarınızı ödəyə bilməz və ödəməməlidir
Bir çox insan evlənəndə düşünür ki, həyat yoldaşı onların hər şeyi olacaq – ən yaxşı dost, emosional dəstəkçi və problemlərin həll yolu. Lakin bu, reallıqda belə deyil.
Sağlam evlilik hər iki tərəfin fərdiliyini qoruyub saxlamasını tələb edir. Sizin də, partnyorunuzun da öz maraqları, dostları və fərdi hədəfləri olmalıdır.
4. Daimi qayğı və dəstək olmadan evlilik dağılacaq
Çox cütlük nikahın uzunömürlülüyü üçün tələb olunan daimi səyləri düzgün qiymətləndirmir.
İlk mərhələlərdə "bal ayı dövrü" romantik və asan görünə bilər. Lakin zaman keçdikcə maliyyə, iş, övladlar və sağlamlıq kimi digər həyat aspektləri ön plana çıxır və münasibətə kifayət qədər diqqət ayrılmır.
"Necə ki, avtomobilin daimi texniki baxış olmadan uzun müddət işləməsini gözləmək olmaz, eyni qaydada, davamlı qayğı olmadan evliliyin uğurla davam etməsini gözləmək mümkün deyil", psixoloq izah edib.
Cütlüklər mütəmadi olaraq vaxt ayırmalı, birgə keyfiyyətli anlar keçirməli və münasibətə daim diqqət yetirməlidirlər.
5. Siz və partnyorunuz zamanla dəyişəcəksiniz, bu normaldır
Siz 25 yaşınızda evləndiyiniz insanın 45 yaşında eyni qalacağını gözləyə bilməzsiniz. İnsanlar dəyişir, inkişaf edir, onların prioritetləri və həyat şərtləri dəyişir.
Bu dəyişikliklərə qarşı çıxmaq əvəzinə onları qəbul etmək və birlikdə böyümək lazımdır. Uğurlu cütlüklər uyğunlaşa bilən və birgə inkişaf edənlərdir.
"Əgər tərəflər bir-birindən uzaqlaşmağa başlayırlarsa, yeni səbəblər taparaq bir-birlərini yenidən sevməyi öyrənməlidirlər. Bu, yeni təcrübələrə açıq olmaq və partnyorun fərdi inkişafına yer ayırmaq deməkdir", deyə Travers qeyd edib.
Aydın
