Türkiyə Mədəniyyət və Turizm Nazirliyinin Turizm Təşviqi və İnkişaf Agentliyi (TGA) tərəfindən türkdilli ölkələrdən olan media nümayəndələrinin qardaş ölkəyə növbəti səfəri baş tutub. Bu dəfəki səfərdə Azərbaycan və Türkmənistandan olan jurnalistlər təmsil olunub. Ramazan ayına təsadüf edən səfər zamanı media nümayəndələri İstanbul və Bursada olub, hər iki şəhərin tarixi və müqəddəs yerlərinə baş çəkib.

Jurnalistlərin olduğu yerlərdən biri də Pyer Loti Teleferiki olub. Teleferikin adı Pyer Lotidən götürülüb. O, 19-20-ci əsrlərdə yaşamış fransız yazıçısı və səyahətçisidir, İstanbulun gözəlliklərini bəyənib və öz əsərlərində təsvir edib.

Teleferik Haliç körfəzinin mənzərəsini izləyərək Eyüp rayonunun ən yüksək nöqtəsinə – Pyer Loti təpəsinə çatır. Uzunluğu təxminən 350 metrdir, səyahət isə təxminən 2 dəqiqə çəkir. Qısa olsa da, səfər zamanı İstanbulun panoramik mənzərələrini izləmək mümkündür.

Teleferikdən Haliç körfəzi, Eyüp Sultan Camisi və qədim Eyüp rayonunun dar küçələri görünür. Xüsusilə gün batımı zamanı turistlər və fotoqraflar üçün çox populyar bir yerdir. Teleferik həmçinin təpənin başında yerləşən kafe və restoranlara giriş imkanı yaradır.

Teleferik modern kabin sisteminə malikdir və təhlükəsizlik baxımından yüksək standartlara cavab verir. Gündəlik çox sayda turist tərəfindən istifadə olunur, xüsusən də yay aylarında.

Pyer Loti kimdir?

Əsl adı Lui Mari Cülyen Viaud olan Pyer Loti 14 yanvar 1850-ci ildə Fransanın Roşfor şəhərində dünyaya gəlib, 10 iyun 1923-cü ildə Hendaye qəsəbəsində vəfat edib. Fransız roman yazarına Pyer Loti adı tələbəlik illərində, bəzi mənbələrə görə isə 1867-ci ildə Okeaniya ekspedisiyası zamanı Taiti yerliləri tərəfindən verilib. "Loti" ekzotik iqlim şəraitində bitən ekzotik bir çiçəyin adıdır.

17 yaşında Fransa Donanmasına qoşulub. Dəniz təlimini başa vurduqdan sonra 1881-ci ildə kapitan rütbəsi alıb və sonrakı illərdə polkovnik rütbəsinə yüksəlib. Yaxın Şərqdə və Uzaq Şərqdə xidmət edib. Dəniz zabiti kimi, bir çox yerlərə səyahət edərək romanlarında təsvir etdiyi xarici mədəniyyətləri tanımaq imkanı əldə edib. Daha sonra bu səyahətlər zamanı qazandığı təcrübə və müşahidələri kitablarında əks etdirib.

1879-cu ildə ilk romanı olan "Aziyade" nəşr olunduqdan sonra, o dövrün Osmanlı Türkiyəsinə nəzər salaraq, 1878-ci ildə "Mariage de Loti" (Lotinin toyu) və 1886-cı ildə "Pecheur d'Island" (İslandiya Balıqçısı) əsərlərini nəşr etdirib.

İstanbula dəfələrlə səfər edən Pyer Loti ilk dəfə 1876-cı ildə bir Fransız gəmisində zabit kimi İstanbula gəlib. Loti Osmanlı həyat tərzindən təsirlənib və bu təsiri bir çox əsərlərində göstərib. O, "Aziyade" romanına adını verən qadınla burada tanış olub. İstanbulda olduğu müddətdə Eyüp Sultanda yaşayıb. İstanbula heyran olan Pyer Loti özünü həmişə Türkiyənin dostu kimi təsvir edib.

1913-cü ildə dövlət qonağı olaraq Türkiyəyə gələrək "La Turquie Agonisante" (Əzab içində olan Türkiyə) kitabında Qərb siyasətini tənqid edərkən, Tophane körpüsündə möhtəşəm bir mərasimlə qarşılanıb və sarayda Sultan Reşat tərəfindən qonaq edilib. Balkan müharibələri, I Dünya müharibəsi və sonrakı Anadolunun işğalı zamanı o, həmişə türkləri Avropaya qarşı müdafiə edib. Loti İstiqlal Müharibəsi zamanı Anadoludakı müqaviməti dəstəkləməklə və öz ölkəsi olan işğalçı dövlət olan Fransanı sərt şəkildə tənqid etməklə türk xalqının rəğbətini qazanıb. Hətta Türkiyə Böyük Millət Məclisi 4 oktyabr 1921-ci ildə Pyer Lotiyə təşəkkür məktubu göndərib. Bundan əlavə, 1920-ci ildə Pyer Loti "İstanbulun Fəxri Vətəndaşı" kimi tanınıb və onun adını daşıyan bir cəmiyyət yaradılıb. Daha sonra İstanbulun Divanyolu qəsəbəsində bir küçəyə Pyer Loti Küçəsi, Eyüp qəsəbəsində bir qəhvəxanaya isə Pyer Loti Qəhvəxanası adı verilib. Bu gün bu qəhvəxananın yerləşdiyi təpə Pyer Loti Təpəsi kimi tanınır. 1942-ci ildə İstanbulun Bəyoğlunda qurulan Pyer Loti Fransız Liseyinə onun adı verilib.

Pərvin