Ukrayna prezidenti Volodimir Zelenski hələ də Ukrayna Silahlı Qüvvələrinin Baş komandanı Valeri Zalujnının istefası ilə bağlı sərəncam imzalamayıb, lakin belə bir senari hələ də mümkündür.

Qaynarinfo bununla bağlı Qərb mediasının icmalını təqdim edir.

"Ukraynanın ən məşhur simalarından birinin vəzifəsindən qovulması çox mübahisəli və Ukraynanın Rusiya ilə münaqişəsində dönüş nöqtəsi olacaq. Hələlik cənab Zelenski generalın əvəzlənməsi barədə açıqlama verməyib. Amma bu, o demək deyil ki, general Zalujnı üçün təhlükə yoxdur, sadəcə ola bilər ki, onun əvəzedicisi hələ müəyyən edilməyib”, - "The Economist” yazır.

"The Economist”in məlumatına görə, yanvarın 29-da Zalujnıya Milli Təhlükəsizlik Şurasının katibi vəzifəsi təklif olunub, lakin o, bundan imtina edib.

Danışıqlarla tanış olan dörd FT həmsöhbətinin sözlərinə görə, Zelenski Zalujnıya müdafiə məsələləri üzrə müşavir vəzifəsini təklif edib. Onlardan ikisi bildirib ki, Zelenski Zalujnıya bu vəzifəni qəbul edib-etməməsindən asılı olmayaraq, hazırkı vəzifəsindən qovulacağını açıqlayıb.

Dörd FT həmsöhbəti bildiriblər ki, Zelenskinin ofisi Zalujnını qovulması barədə qərar qəbul etsə də, planlar barədə Ukrayna mətbuatında xəbərlər yayıldıqdan sonra o, bir müddət işdən çıxarılmaya bilər.

Dörd mənbə bildirib ki, Zalujnını baş komandan kimi kimin əvəzləyəcəyi bəlli deyil. FT mümkün namizədlər kimi Zelenskiyə yaxın olan Ukrayna Quru Qoşunlarının komandanı Aleksandr Sırski və Hərbi Kəşfiyyat Baş İdarəsinin rəisi Kirill Budanovun adını çəkir.

BBC-nin hərbi dairələrdəki mənbələri bildirirlər ki, nə Sırski, nə də Budanov Zalujnının kürsüsünə keçməyə həvəsli deyil və bu təyinatdan imtina ediblər. Digər tərəfdən, Ukrayna xüsusi xidmət orqanlarından birindən olan mənbə deyir ki, hər hansı generalın prezidentin onu baş komandan təyin etmək qərarını yerinə yetirməkdən imtina edəcəyini təsəvvür etmək mümkün deyil.

Ukraynanın müdafiə sektorunda BBC-nin həmsöhbətləri deyirlər ki, indiki şəraitdə Ukrayna Silahlı Qüvvələrinin baş komandanının istefası zaman məsələsi kimi görünür. Onlar Zelenski ilə Zalujnı arasında fikir ayrılıqlarının sayının kritik həddə çatdığını deyirlər. Çox güman ki, söhbət təkcə hərbi əməliyyatlara fərqli baxışlardan deyil, həm də şəxsi ziddiyyətlərdən və onlar arasında etimadın olmamasından gedir.

BBC-nin məlumatına görə, Volodimir Zelenski, Valeri Zalujnı və müdafiə naziri Rustem Umerov bazar ertəsi Prezident ofisində ofisin rəhbəri Andrey Yermaksız görüşüb. Görüş sakit tonda keçib, prezident bildirib ki, o, Ukrayna Silahlı Qüvvələrinin baş komandanını vəzifəsindən azad etmək qərarına gəlib və yaxın vaxtlarda bu barədə sərəncam imzalanacaq.

BBC-nin məlumatına görə, Zelenski son aylarda Zalujnını bir neçə dəfə vəzifədən kənarlaşdırmağa yaxın olub. Yanvarın 29-da prezidenti baş komandana bunun qaçılmazlığı barədə məlumat verməyə nəyin vadar etdiyi dəqiq məlum deyil.

Cəbhədəki vəziyyət son vaxtlar ciddi dəyişikliklərə məruz qalmayıb. Son zamanların ən mühüm xəbəri keçən həftə Belqorod yaxınlığında Rusiyaya məxsus İl-76 təyyarəsinin qəzaya uğraması olub, lakin bu hadisənin təfərrüatları hələ də məlum deyil.

BBC-nin həmsöhbətlərindən biri bildirib ki, prezident bazar ertəsi söhbətində Zalujnının istefasının zəruriliyini Ukraynanın bütün milli təhlükəsizlik və müdafiə orqanları sistemini yenidən canlandırmaq istədiyi ilə əsaslandırıb. Bununla belə, digər təhlükəsizlik, hərbi və hüquq-mühafizə orqanlarında kadr dəyişikliyi barədə məlumat daxil olmayıb.

Zalujnıya qərarını elan etdikdən sonra prezidentin sərəncamının elan edilməsinə nəyin mane olduğu da məlum deyil. BBC-nin hakimiyyətdəki həmsöhbətləri iki əsas variantı səsləndiriblər: ya Kiyevin qərb tərəfdaşları vəziyyətə müdaxilə edib, ya da yeni baş komandanın təyinatı ilə bağlı problem var.

"The Economist” qeyd edir ki, 58 yaşlı Sirski döyüş əməliyyatlarına sərt yanaşmasına görə hərbçilər arasında populyar deyil, 38 yaşlı Budanov isə indiyədək heç vaxt adi silahlı qüvvələrə və ya milyon nəfərlik bir təşkilata rəhbərlik etməyib. Ehtimal edilir ki, məhz bu səbəblərə görə Baş Kəşfiyyat İdarəsinin rəisi baş komandan vəzifəsindən imtina edib.

Nəşr yazır ki, vəziyyət dalana dirənib. Bildirilir ki, prezidentin artıq güvənmədiyi Baş komandanı dəyişdirmək hüququ var, lakin "əsgərlər və ictimaiyyət arasında general Zalujnı kimi məşhur olan bir şəxsi vəzifəsindən uzaqlaşdırmaq siyasi və hərbi risklər daşıyır”.

"The Economist”in məlumatına görə, Zalujni genişmiqyaslı səfərbərliklə bağlı Zelenskiyə təzyiq göstərib, onlar hərbi strategiya haqqında mübahisə ediblər və baş komandanın artan populyarlığı Prezident ofisini narahat edə bilər.

"Bu hekayənin necə bitəcəyi bəlli deyil. Lakin Zelenski baş komandanı vəzifəsində saxlasa, zəif görünəcək. Əgər onu işdən çıxarsa, bunun yöndəmsiz üsulla edilməsi yalnız hakimiyyətə zərər verəcək”, - "The Economist”in materialında deyilir.

Nizami Bağırov