Şimali Atlantika Alyansı ölkələri hava hücumundan müdafiə sistemlərinin çatışmazlığı ilə üzləşib.
Qaynarinfo xəbər verir ki, bu barədə Estoniya Müdafiə Nazirliyinin rəhbəri Hanno Pevkur ERR telekanalına müsahibəsində bildirib .
"Bütün NATO ölkələri üçün əslində böyük problem olan çatışmazlıq ballistik raketdən müdafiə qabiliyyətidir, yəni 20 km hündürlükdə və 150-200 km məsafədə raketləri vurmaq qabiliyyətidir", - Pevkur bildirib. Eyni zamanda o vurğulayıb ki, yaxın mənzilli raketlərin tutulması üçün sistemlərin çatışmazlığından söhbət getmir.
"Financial Times”ın əvvəllər dərc etdiyi NATO daxili hesablamalarına görə, NATO ölkələri Mərkəzi və Şərqi Avropada alyans üzvlərini tammiqyaslı hücumdan qorumaq üçün lazım olan hava hücumundan müdafiə vasitələrinin 5%-dən azını təmin edə bilər.
Yüksək səviyyəli NATO diplomatı FT-yə deyib ki, hava hücumundan müdafiə "bizim ən böyük boşluqlarımızdan biridir. Biz bunu inkar edə bilmərik", - o deyib. Britaniya hökuməti də 2023-cü ildə hava məkanının mühafizəsi problemini qəbul edib və bunu "son 30 ilin ən aktual problemi” adlandırıb.
NATO rəsmisi FT-yə deyib ki, hava və raketdən müdafiə "əsas prioritet”dir, lakin hava hücumundan müdafiə ehtiyatları azalıb. Onun sözlərinə görə, alyansın yeni müdafiə planları "kəmiyyət və döyüş baxımından” hava və raket hücumundan müdafiə tələblərini xeyli artırır. Bu baxımdan, alyans ölkələri yeni hava hücumundan müdafiə sistemlərinə, o cümlədən qırıcı təyyarələrə sərmayə qoymağı planlaşdırır, - NATO nümayəndəsi qeyd edib.
Həmçinin NATO ölkələri Rusiyanın tammiqyaslı işğalından sonra Ukraynaya əlavə hava hücumundan müdafiə sistemləri verə bilməyib. Alyans üzvlərinin müvafiq sistemləri azdır, ona görə də onları öz ölkələrindən kənarda yerləşdirə bilməzlər, - FT mənbəyi izah edib.
Avqust ayında Bloomberg yazıb ki, bir sıra NATO üzvləri Ukraynaya hava hücumundan müdafiə sistemlərinin tədarükü ilə bağlı kommunikasiyalara əməl etmirlər. Agentliyin mənbələri konkret ölkələrin adını çəkməsələr də, məlumdur ki, ABŞ, Almaniya və Rumıniya Kiyevə "Patriot” sistemlərini, İtaliya isə SAMP-T sistemini verməyi vəd edib.
