Nissan avtomobil istehsalçısının bütün Rusiya aktivləri, o cümlədən Sankt-Peterburqdakı zavod və Moskvadakı satış və marketinq mərkəzi FSUE NAMI tərəfindən təmsil olunan dövlət mülkiyyətinə çevriləcək.
Qaynarinfo xəbər verir ki, bu barədə RBC Sənaye və Ticarət Nazirliyinə istinadən məlumat
yayıb.
"AvtoVAZ” Rusiyada "Nissan” avtomobillərinə texniki xidmət göstərilməsi və onların ehtiyat hissələrinin tədarükü ilə məşğul olacaq. Şirkətdən bildirilib ki, lazımi müqavilələr imzalandıqdan sonra AvtoVAZ "zəmanət və satışdan sonrakı xidmət funksiyalarının öz idarəçiliyində olan Nissan müştərilərinə ötürülməsi prosesinə başlayacaq və bunun üçün Renault brendi ilə oxşar uğurlu təcrübədən istifadə olunacaq”.
Sənaye və Ticarət Nazirliyinin rəhbəri Denis Manturov Nissan zavodunda istehsal dövrü və 2000 iş yerinin qorunub saxlanacağına söz verib. Nissan prezidenti Makoto Uçida öz növbəsində aktivlərin köçürülməsi qərarını "işçilərə dəstək olmaq üçün ən yaxşı üsul" adlandırıb.
Xatırladaq ki, Nissan Ukraynada müharibənin başlamasından və Rusiya Federasiyasına qarşı ilk sanksiyalardan az sonra, mart ayında Rusiyada istehsalı dayandırıb. Şirkət rəhbərliyi istehsalın dayandırılmasını xaricdən gətirilən hissələrin olmaması ilə izah edib, buna tədarük zəncirinin pozulması səbəb olub. Eyni zamanda, "Toyota” və "Hyundai” zavodlarının fəaliyyəti dayandırılıb.
Alpər
