Qaynarinfo xəbər verir ki, sənədlərdə 150 metr ölçüsündə səssiz üçbucaqlar, yüksək sürətlə hərəkət edən obyektlər, metal kürə və saatın 25 dəqiqə irəli getməsi kimi qeyri-adi iddialar yer alır.

Əfqanıstan üzərində 150 metrlik səssiz üçbucaq

Sənədlərdə diqqət çəkən hadisələrdən biri 2002-ci ildə Əfqanıstandakı Baqram Hava Bazasının üzərində baş verib.

Hərbi pilot səhər saat 04:30 radələrində həmkarı ilə birlikdə səmanı müşahidə edərkən ulduzların qəfildən yox olmağa başladığını bildirib. Pilotun sözlərinə görə, onların üzərindən çox böyük bir obyekt keçib.

Şahid obyektin təxminən 150 metr enində, bərabərtərəfli üçbucaq formasında olduğunu deyib. Heç bir işığı olmayan obyekt səssiz şəkildə sabit sürət və hündürlükdə hərəkət edib.

Pilot obyektin təxminən saatda 278 kilometr sürətlə hərəkət etdiyini təxmin edib. Onun yanında olan digər pilot da obyekti görüb.

Şahid həmin vaxt hadisəni rəsmi şəkildə bildirməyib. Daha sonra apardığı araşdırmalarda gördüklərini izah edə biləcək hər hansı vasitə və ya hadisə aşkar etmədiyini bildirib.

Eyni pilot illər sonra fərqli işıqlar görüb

Sənədə əsasən, həmin pilot 2023-cü ilin oktyabrından etibarən kommersiya uçuşları zamanı başqa izaholunmaz işıqlar da görməyə başlayıb.

İlk hadisə Boston–Dublin reysi zamanı, təxminən 11 min metr yüksəklikdə baş verib. Pilot işıqların onun təyyarəsindən ən azı 4 min metr daha yüksəkdə olduğunu düşündüyünü bildirib.

Bəzi işıqlar hərəkətsiz qalarkən, digərləri düz xətt üzrə hərəkət edib və ya qəfil istiqamət dəyişib. Onların parlaqlığı isə 10 saniyə ilə bir dəqiqə arasında dəyişən intervallarla artıb və azalıb.

Pilot təyyarələri, meteorları, peykləri və "Starlink” peyklərini mümkün izahlar kimi nəzərdən keçirib, lakin müşahidə etdiyi hərəkətlərin bunlarla uyğun gəlmədiyini bildirib.

Şahid bu cür hadisələri təxminən 10 dəfə gördüyünü və bəzi müşahidələrin 45 dəqiqədən iki saata qədər davam etdiyini deyib.

2024-cü ilin fevralında Sioux Falls yaxınlığında uçuş zamanı hərəkət edən və parlaqlığı dəyişən 10-dan çox işığı videoya çəkib. Pilot obyektlərin ən azı 160 kilometr uzaqda olduğunu düşündüyündən hər hansı təhlükə hiss etmədiyini bildirib.

Koloradoda nəhəng qara üçbucaq iddiası

Digər bir FTB sənədində isə 2023-cü ilin oktyabrında Kolorado-Sprinqs üzərində görüldüyü iddia edilən böyük qara obyekt təsvir olunur.

Şahid açıq bir gecədə iş yoldaşı ilə çöldə olarkən səmada tünd boz rəngli və hərəkətsiz bulud gördüyünü bildirib. O, buludun görüntüsünü təhrif olunmuş və ya pikselləşmiş kimi təsvir edib.

Qısa müddət sonra buludun içindən qırmızı işıq çıxıb. Ardınca şahidin sözlərinə görə, tamamilə qara, nəhəng üçbucaq peyda olub. Obyektin üç küncündə də qırmızı işıq olub.

Şahid obyektin dayandığı avtomobil dayanacağı qədər geniş olduğunu, hündürlüyünün isə üç-beşmərtəbəli bina ölçüsündə olduğunu təxmin edib.

Obyekt əvvəlcə helikopterə yaxın sürətlə hərəkət edib. Daha sonra şahidin təxmininə görə, çox qısa müddət ərzində səs sürətinin bir-iki mislinə çatıb.

Şahid həmçinin obyektin ətrafında isti asfalt üzərində görünən dalğalanmaya bənzər görüntünün yarandığını bildirib. Obyekt bu zaman səs çıxarmayıb və şahid hər hansı mühərrik və ya hərəkətverici sistem görməyib.

İddiaya görə, obyekt daha sonra sola doğru 90 dərəcə dönərək sağ istiqamətə yönəlib. Ardınca yenidən düz istiqamətə keçərək gözdən itib.

Şahid arxaya baxdıqda obyektin peyda olduğunu düşündüyü qəribə buludun da yoxa çıxdığını deyib.

Təxminən bir dəqiqə sonra həyat yoldaşına telefonla zəng edib. Həyat yoldaşı şahidin səsinin elektron müdaxilə səbəbindən "robotik” gəldiyini bildirib.

FTB-nin sənədində bu məlumatlar qeydə alınıb, lakin obyektin nə olduğu barədə nəticəyə gəlinməyib. Həmçinin şahidin sürət, ölçü və hündürlüklə bağlı təxminləri müstəqil şəkildə təsdiqlənməyib.

Aydın