ABŞ prezidenti Donald Trampın administrasiyası onun yeni Sülh Şurasında daimi yer almaq istəyən ölkələrdən ən azı 1 milyard dollar nağd ödəniş tələb edir.

Qaynarinfo xəbər verir ki, bu barədə "Bloomberg” Şuranın nizamnamə layihəsinə istinadla yazır.

Qeyd olunur ki, layihəyə əsasən Tramp Şuranın ilk sədri olacaq və üzvlüyə kimi dəvət edəcəyini şəxsən müəyyənləşdirəcək. Qərarlar səs çoxluğu ilə qəbul ediləcək: hər üzv dövlətin bir səsi olacaq, lakin bütün qərarlar sədrin təsdiqini tələb edəcək.

"Üzv dövlət nizamnamənin qüvvəyə mindiyi andan etibarən ən çoxu üç il müddətinə yer tutacaq və sədrin qərarı ilə bu müddət uzadıla bilər. Lakin nizamnamə qüvvəyə mindikdən sonra ilk il ərzində Sülh Şurasına 1 000 000 000 ABŞ dollarından artıq məbləğdə nağd pul köçürən dövlətlər üçün üçillik müddət məhdudiyyəti tətbiq edilmir”, deyə sənəddə qeyd edilir.

Nizamnamədə Sülh Şurası münaqişədən zərər çəkmiş və ya münaqişə təhlükəsi altında olan regionlarda sabitliyi təşviq etməyə, etibarlı və qanuni idarəetməni bərpa etməyə və davamlı sülhü təmin etməyə çalışan beynəlxalq təşkilat kimi təsvir olunur. Təşkilat ən azı üç dövlət nizamnaməni qəbul etdikdən sonra rəsmi status alacaq.

Tənqidçilər Trampın dəfələrlə tənqid etdiyi Birləşmiş Millətlər Təşkilatına alternativ və ya rəqib qurum yaratmaq istədiyindən narahatdırlar.

Məqalədə bildirilir ki, Tramp artıq Qəzza üçün nəzərdə tutulan və daha geniş təşəbbüs – ümumi Sülh Şurası çərçivəsində yaradılacaq şuraya qoşulmaq təklifini bir sıra dünya liderlərinə, o cümlədən Argentina prezidenti Xavyer Mileyə və Kanadanın baş naziri Mark Karniyə göndərib. Nəşrin məlumatlı mənbələrinə görə, bir neçə Avropa ölkəsi də Şuraya dəvət alıb.

"Bloomberg”in həmsöhbətlərinin sözlərinə görə, nizamnamə layihəsi Trampın maliyyə resurslarına birbaşa nəzarətini nəzərdə tutur ki, bu da potensial iştirakçıların əksəriyyəti tərəfindən qəbuledilməz sayılır. Mənbələr əlavə ediblər ki, bir neçə dövlət təklif olunan nizamnaməyə qəti etiraz edir və bu təşəbbüsə qarşı birgə mövqe formalaşdırır.

Amerikalı rəsmi nəşrə təsdiqləyib ki, ölkələr Şuraya ödənişsiz qoşula biləcəklər, lakin 1 milyard dollar məbləğində töhfə daimi üzvlüyə zəmanət verəcək. Onun sözlərinə görə, toplanan vəsaitlər birbaşa Sülh Şurasının mandatının icrasına, o cümlədən Qəzzanın bərpasına yönəldiləcək. O, həmçinin demək olar ki, hər dolların təyinatı üzrə istifadə olunacağını vurğulayıb.

Nizamnamə layihəsinə əsasən, Tramp üzv dövlətlərin 2/3-nin səsi ilə bloklanmadığı halda, Şuranın istənilən üzvünü vəzifədən kənarlaşdıra biləcək.

"Sədr istənilən vaxt öz yerinə keçəcək şəxsi müəyyən edə bilər”, deyə sənəddə qeyd olunur.

Cümə günü Ağ Ev ilk icraçı qrupun yaradıldığını elan edib. Qrupa dövlət katibi Marko Rubio, xüsusi nümayəndə Stiv Uitkoff, Trampın kürəkəni Cared Kuşner və Böyük Britaniyanın keçmiş baş naziri Toni Bleyer daxildir.

Aydın