Nəşrin məlumatına görə, Ukraynanın seçki komissiyasının nümayəndələri hesab edir ki, ölkə bu il seçki keçirməməlidir. Rəsmi seçki işçi qrupunun üzvləri ötən ayın sonunda parlamentə qanun layihəsi təqdim etməyi planlaşdırsa da, seçkilərin Rusiya hücumları və müdaxiləsindən qorunaraq necə ədalətli keçiriləcəyinə dair əsas məsələlərin hələ həll olunmadığını bildiriblər.

Müzakirələrin ən azı may ayının sonuna qədər davam etdirilməsi planlaşdırılır. Eyni zamanda, qrup belə bir razılığa gəlib ki, seçki kampaniyası yalnız müzakirələr başa çatdıqdan, zəruri qanunvericilik qəbul edildikdən və atəşkəs rejimi tətbiq olunduqdan sonra ən gec altı ay ərzində başlamalıdır. Bu isə faktiki olaraq bu il prezident seçkilərinin keçirilməsini mümkünsüz edir.

Ukrayna Mərkəzi Seçki Komissiyası sədrinin müavini Serhiy Dubovik bildirib: "Parlament üzvləri də daxil olmaqla hamı razıdır ki, aktiv döyüş mərhələsi dayandırılmalı, aydın demarkasiya xətti müəyyənləşdirilməli və yalnız bundan sonra seçkilərin təşkili üçün altı aylıq müddət verilməlidir. Artıq vaxt qrafiki dəyişdirilib. Tam aydındır ki, sistem aprel və may aylarında işləməyə davam edəcək, çünki hələ bütün problemlər həll olunmayıb".

Qeyd olunur ki, prezident seçkiləri hərbi vəziyyət şəraitində konstitusiyaya referendum yolu ilə dəyişiklik edilərək keçirilə bilər. Lakin işçi qrup döyüş əməliyyatları zamanı səsvermənin keçirilməsini istisna edib. Səbəb kimi seçki məntəqələrinə hücumlar nəticəsində kütləvi itkilər riski göstərilir. Bundan əlavə, hərbi vəziyyət çərçivəsində tətbiq olunan söz və hərəkət azadlığı məhdudiyyətlərinin seçki kampaniyasına mane ola biləcəyi vurğulanır.

Dubovik əlavə edib ki, müxalifət partiyaları rəqəmsal səsverməyə razılaşmaq istəmir. Onların fikrincə, belə sistem hökumət tərəfindən saxtalaşdırıla bilər və beynəlxalq müşahidə missiyaları üçün qapalı qalacaq.

ABŞ tərəfindən edilən təzyiq Ukrayna prezident administrasiyasını dekabr ayında xüsusi işçi qrup yaratmağa vadar edib. Qrupa seçki komissiyalarının nümayəndələri, parlament üzvləri və vətəndaş cəmiyyəti təmsilçiləri daxildir. Bildirilir ki, qrupun qarşılaşdığı problem "presedentsiz" xarakter daşıyır.

"Qrup xaricdə yaşayan təxminən altı milyon qaçqının, Rusiya işğalı altında olan ərazilərdə yaşayan təxminən üç milyon ukraynalının və cəbhədə xidmət edənlər də daxil olmaqla, bir milyona yaxın hərbçinin səsverməsini necə təmin etməyi araşdırır. Seçkilər həmçinin Ukraynanın Avropa İttifaqına üzvlük planlarına xələl gətirməmək üçün beynəlxalq standartlara uyğun olmalıdır. Bu cür səsvermənin keçirilməsi ilə bağlı presedent yoxdur, xüsusilə də Avropa Şurasının normaları kimi mövcud beynəlxalq standartlar çərçivəsində. İstinad edə biləcəyimiz nümunə yoxdur", deyə Dubovik qeyd edib.

ABŞ-ın keçmiş prezidenti Donald Trampın administrasiyasının müşavirləri bu vəziyyəti ABŞ-da Vətəndaş müharibəsi dövründə – 1864-cü ildə keçirilmiş prezident seçkiləri ilə müqayisə ediblər. Dubovik isə ukraynalıların üzləşdiyi risklərin – hava hücumları, kibertəhdidlər və informasiya müharibəsinin – düzgün qiymətləndirilməməsindən təəccübləndiyini bildirib.

"Ad çəkməyəcəyəm, amma bilirsiniz onlar hansı nümunəni göstərdilər? ABŞ-da Vətəndaş müharibəsi. Dedilər ki, biz həmin vaxt seçki keçirmişik, siz niyə keçirə bilmirsiniz? Bu fikir Tramp administrasiyasından gəlirdi", deyə o vurğulayıb.

Onun sözlərinə görə, Britaniya tərəfinin tövsiyələri daha faydalı olub. Məsələn, Polşa vətəndaşlarının Böyük Britaniyada necə səs verdiyini öyrənmək təklif edilib. Seçicilər əvvəlcədən qeydiyyatdan keçməli olur, lakin yalnız səfirlik və konsulluqlarda deyil, məktəblər və ictimai mərkəzlərdə də səs verə bilirlər.

Aydın