Kiyevə "ayıldıcı” səfərindən sonra ABŞ dövlət katibi Entoni Blinken prezident Co Baydeni Ukraynanın Rusiya ərazisində ABŞ silahlarından istifadəsinə qoyulan məhdudiyyətləri aradan qaldırmağa çağırıb.

Qaynarinfo xəbər verir ki, bu barədə "The New York Times” yazır.

ABŞ Dövlət Departamentinin təşəbbüsü ilə hazırda Ağ Evdə bilavasitə Ukrayna ilə sərhəddə yerləşən Rusiya Federasiyası ərazisində raket və artilleriya qurğularının vurulmasına qoyulan qadağanın yumşaldılması ilə bağlı fəal müzakirələr gedir.

Dövlət katibi Entoni Blinkenin keçən həftə Kiyevə səfərindən sonra irəli sürdüyü təklif hələ başlanğıc mərhələsindədir və Baydenin yaxın çevrəsindəki həmkarlarından neçəsinin bu təklifi dəstəklədiyi bəlli deyil.

Rəsmilərin dediyinə görə, təklif hələlik rəsmi şəkildə prezidentə təqdim edilməyib.

Dövlət Departamentinin sözçüsü Metyu Miller daxili müzakirələri şərh etməkdən imtina edib, lakin müzakirələrdə iştirak edən rəsmilər rusiyalıların müharibədə yeni cəbhə açması ilə Blinkenin mövqeyinin dəyişdiyini və bunun dağıdıcı nəticələrə səbəb olduğunu söyləyib.

Rusiya qoşunları Ukraynanın şimal-şərqindəki sərhədin o tayında silah yerləşdirib və onları Xarkova yönəldib, çünki cavab olaraq ukraynalılar yalnız ABŞ-a aid olmayan PUA və digər silahlardan zərbələr endirmək üçün istifadə edə bilirlər.

Bundan əlavə, müdafiə naziri Lloyd Ostin, Rusiya ərazisində uçan Rusiya təyyarələri üçün istisnaların edilə biləcəyini ehtimal edib.

"Hava dinamikası bir az fərqlidir... Və buna görə də - amma yenə də, mən burada tribundan hər hansı bir iştirak növü haqqında spekulyasiya etmək istəmirəm", - Ostin bildirib.

NYT yazır ki, ruslar bu cür debatlara öyrəşiblər və onlar Amerikanın müharibənin şiddətlənməsi ilə bağlı qorxuları ilə oynadıqlarını gizlətmirlər.

Bir müddət əvvəl Dövlət Departamentində vəzifəsini tərk edən Viktoriya Nuland administrasiyanın mövqeyindən nəzərəçarpacaq dərəcədə uzaqlaşaraq indi açıq şəkildə deyir ki, administrasiya Rusiya daxilindəki hədəflərə qarşı silahların istifadəsinə qoyulmuş qadağanı ləğv etməlidir.

"Düşünürəm ki, əgər hücumlar Rusiya sərhədinin yaxınlığında baş verirsə, o zaman bu bazaları vurmaq ədalətli oyun olmalıdır", - Nuland bildirib.

"Məncə, bunun vaxtıdır, çünki Rusiya açıq şəkildə bu müharibəni daha da gərginləşdirib" - o əlavə edib və Rusiyanın Xarkova hücumunun "ayaqlarını belə yerə basmadan onu məhv etmək" cəhdi olduğunu qeyd edib.

Qeyd olunur ki, Bayden və onun bəzi köməkçiləri Vladimir Putinin heç vaxt nüvə silahından istifadə etməyəcəyinə əmin deyillər. Keçən bir il ərzində onlar ondan daha güclü reaksiyaya səbəb olacaq qırmızı xəttin olduğuna inandıqlarını söyləyiblər, lakin bunun nədən ibarət olduğunu və ya cavabın nə ola biləcəyini dəqiq bilmirlər.

Nizami Bağırov