Ukraynanın prezidentin müharibə zamanı öləcəyi təqdirdə planı var, baxmayaraq ki, Ukrayna rəsmiləri bu barədə açıq danışmaqdan imtina edirlər.
Qaynarinfo xəbər verir ki, bu barədə Amerikanın "Politico” nəşri
yazır.
Nəşrin müəllifləri qeyd edirlər ki, prezidentin rus qoşunları tərəfindən mümkün sui-qəsd məsələsi nə Ukraynada, nə də Qərbdə diqqətdən kənarda qala bilməz. Vladimir Zelenski sadəcə olaraq dövlətin formal lideri deyil: o, Rusiyaya qarşı mübarizəyə beynəlxalq dəstəyin cəlb edilməsində şəxsən əsas rol oynayır.
Politico xatırladır ki, tammiqyaslı müharibənin əvvəlində Ukrayna rəsmilərinin dediyinə görə, ruslar Ukrayna prezidentini aradan götürmək üçün bir neçə dəfə cəhd ediblər və radikal rus deputatları və "hərbi müxbirlər” hələ də müntəzəm olaraq Zelenskini öldürməyi tələb edirlər.
"Həyatı üzərində olan təhlükə səbəbindən Zelenskinin xarici səfərləri son dərəcə məxfiliklə planlaşdırılır. Ukrayna rəsmiləri bu ilin fevralında onun gözlənilən gəlişindən 3 gün əvvəl Brüsselə planlaşdırılan səfərlə bağlı məlumat ortaya çıxanda qəzəblənib və bu, onu təhlükə altına qoyub”, - qəzet yazır.
Nəşr qeyd edir ki, Ukrayna rəsmilərinin bu barədə danışmaq istəməməsinə baxmayaraq, Zelenskinin ölümü ilə bağlı fəaliyyət planı mövcuddur. Keçən il ABŞ-ın dövlət katibi Entoni Blinken müsahibəsində "hökumətin davamlılığı” ilə bağlı "Ukraynalıların planları var” deyərkən, əslində bunu təsdiqləmişdi.
Formal olaraq Konstitusiyaya görə, hakimiyyətin ötürülməsi xətti aydındır: prezident öz vəzifələrini yerinə yetirə bilməyəndə onun səlahiyyətlərini Ukrayna Ali Radasının sədri üzərinə götürür. "Politico” qeyd edir ki, Ali Radanın hazırkı sədri – Ruslan Stefançukun əhali arasında o qədər də yüksək etimad reytinqi yoxdur, lakin bu, çətin ki, problem yaratsın.
Atlantik Şurasının Avrasiya Mərkəzinin baş elmi işçisi Adrian Karatnitski hipotetik vəziyyəti izah edir: "Güclü liderlik komandası var və məncə, biz kollektiv hökumət görəcəyik".
Nəşr təklif edir ki, Zelenskinin yoxluğunda Stefançuk, Prezident Aparatının rəhbəri Andrey Yermak, xarici işlər naziri Dmitri Kuleba və müdafiə naziri Oleksiy Reznikov birlikdə dövlətə rəhbərlik edəcək. Valeri Zalujnı ordunun baş komandanı postunda qalacaq.
"Ölkə çox əhəmiyyətli həmrəylik və milli birlik həddinə çatıb, ona görə də Zelenskinin başına dəhşətli bir şey gəlsəydi, bu, düşündüyünüz qədər həlledici olmazdı”, - Karatnitski bildirib.
O qeyd edib ki, Ukraynada "təkmilləşmiş” inzibati, hərbi və diplomatik maşın yaradılıb.
"Politico” qeyd edir ki, dünya tarixi də yuxarıda deyilənləri təsdiqləyir. ABŞ Milli İqtisadi Araşdırmalar Bürosunun ekspertlərinin hesablamalarına görə, son 150 ildə milli liderlərə qarşı 59 sui-qəsd olub.
"Avtokratların öldürülməsi ölkənin təsisatlarında əhəmiyyətli dəyişikliklərə səbəb olur, lakin demokratların öldürülməsi elə deyil”, - deyə onlar yekunlaşdırıblar.
Amerikalı publisist Kris Uippl hesab edir ki, ruslar Zelenskini fiziki cəhətdən aradan qaldırmaq üçün ən azı 12 cəhd edib və ya etməyi planlaşdırıblar. Bu barədə PA rəhbərinin müşaviri Mixail Podolyak da danışıb, o, işğalın ilk həftələrində ən azı 10 belə cəhdi sayıb.
SNBO (Ukrayna Milli Təhlükəsizlik və Müdafiə Şurası) katibi Aleksey Danilovun sözlərinə görə, müəyyən məqamda Zelenski xüsusi xidmət orqanlarının düşmənin ona növbəti sui-qəsd hazırlaması ilə bağlı davamlı xəbərdarlıqlarından o qədər bezib ki, ona bu mesajlardan narahat olmağı qadağan edib.
Alpər
